ലണ്ടന്‍: കൊവിഡിനെ തുടര്‍ന്നു പ്രഖ്യാപിച്ച ലോക്ഡൗണിനെ തുടര്‍ന്ന് വായു മലിനീകരണം കുറഞ്ഞതിനാല്‍ ഇന്ത്യയില്‍ 630 പേരുടെയെങ്കിലും മരണം ഇല്ലാതായെന്ന് പഠന റിപ്പോര്‍ട്ട്.
ഡല്‍ഹി, മുംബൈ ഉള്‍പ്പെടെയുള്ള അഞ്ച് നഗരങ്ങളില്‍ ലോക്ഡൗണ്‍ പ്രഖ്യാപിച്ചതുമൂലം വായുമലിനീകരണം മൂലമുള്ള മരണം നടന്നില്ലെന്നാണ് ബ്രിട്ടനിലെ സറെ യൂനിവേഴ്‌സിറ്റിയിലെ ഉള്‍പ്പെടെ ശാസ്ത്രജ്ഞര്‍ പറയുന്നത്.
രാജ്യത്തിന് ആരോഗ്യ മേഖലയില്‍ 6.90 കോടി ഡോളറിന്റെ ചെലവ് കുറയാനും ഇത് ഇടവരുത്തിയെന്ന് പഠനം പറയുന്നു. ലോക്ഡൗണിനെ തുടര്‍ന്ന് ഡല്‍ഹി, മുംബൈ, കൊല്‍ക്കത്ത, ചെന്നൈ, ഹൈദരാബാദ് എന്നീ നഗരങ്ങളില്‍ വാഹനങ്ങളില്‍ നിന്നും മറ്റുമുള്ള മലിനീകരണമില്ലാതായി.
മുംബൈയില്‍ വായുമലിനീകരണം 10 ശതമാനവും ഡല്‍ഹിയില്‍ 54 ശതമാനവും കുറഞ്ഞതായി സസ്‌റ്റെയിനബിള്‍ സിറ്റീസ് ആന്‍ഡ് സൊസൈറ്റി എന്ന ജേണലില്‍ പ്രസിദ്ധീകരിച്ച പഠനം ചൂണ്ടിക്കാട്ടുന്നു. ആസ്‌ത്രേലിയന്‍ തലസ്ഥാനമായ വിയന്നയില്‍ വായുമലിനീകരണം 60 ശതമാനവും ചൈനയിലെ ഷാങ്ഹായിയില്‍ 42 ശതമാനവും കുറഞ്ഞതായി പഠനം പറയുന്നു.