ലണ്ടന്‍: കാര്‍ഗോ കമ്പനിക്ക് പണം നല്‍കാത്തതിനെ തുടര്‍ന്ന് ജെറ്റ് എയര്‍വേയ്‌സ് കമ്പനിയുടെ വിമാനം വിദേശത്ത് ജപ്തി ചെയ്തു. യൂറോപ്യന്‍ കാര്‍ഗോ കമ്പനിക്ക് വന്‍തുക നല്‍കാനുള്ളത് കണക്കിലെടുത്താണ് ജപ്തി നടപടി.
ആംസ്റ്റര്‍ഡാം വിമാനത്താവളത്തില്‍വച്ചാണ് വിമാനം ജപ്തി ചെയ്തത്. മുബൈയില്‍ നിന്ന് വ്യാഴാഴ്ച ആംസ്റ്റര്‍ഡാമിലേക്ക് പോയതായിരുന്നു ബോയിങ് 777300 വിമാനം. യൂറോപ്യന്‍ കമ്പനിക്കുള്ള അടവുകള്‍ മുടങ്ങിയതിനാല്‍ ആംസ്റ്റര്‍ഡാമിലെ ശിപോള്‍ വിമാനത്താവളത്തില്‍വച്ച് വിമാനം കമ്പനി അധികൃതര്‍ പിടിച്ചെടുക്കുകയായിരുന്നു. യാത്രക്കാരെ വിമാനത്തില്‍ കയറ്റിയിട്ടില്ല. ഇന്ത്യയിലേക്ക് ഈ വിമാനത്തില്‍ യാത്ര തിരിക്കാനുള്ളവര്‍ വിമാനത്താവളത്തില്‍ കാത്തിരിക്കുകയാണ്. ജപ്തി ചെയ്യപ്പെട്ട വിമാനം വ്യാഴാഴ്ചയാണ് ആംസ്റ്റര്‍ഡാമില്‍ നിന്ന് തിരിക്കേണ്ടത്. എന്നാല്‍ ചില 'സാങ്കേതിക' കാരണങ്ങളാല്‍ വിമാനത്തിന്റെ മടക്കയാത്ര വൈകുമെന്ന് അറിയിച്ചിരിക്കുകയാണ് കമ്പനി അധികൃതര്‍.കടുത്ത സാമ്പത്തിക ബാധ്യതയിലുള്ള ജെറ്റ് എയര്‍വേയ്‌സ് കമ്പനിയുടെ 123 വിമാനങ്ങളില്‍ 25 വിമാനങ്ങള്‍ മാത്രമേ നിലവില്‍ സര്‍വിസ് നടത്തുന്നുള്ളു. അതിലൊന്നാണ് ഇപ്പോള്‍ കണ്ടുകെട്ടിയിട്ടുള്ളത്.