മുക്കം: എസ്.എഫ്.ഐ നേതാവ് അഭിമന്യുവിന്റെ കൊലപാതകം ഒറ്റപ്പെട്ട സംഭവമല്ലെന്നും തീവ്രവാദ സംഘടനകളായ പോപ്പുലര്‍ ഫ്രണ്ടും എസ്.ഡി.പി.ഐയും തികച്ചും ആസൂത്രിതമായി നടപ്പാക്കിയ കൊലപാതകമാണെന്നും സി.പി.എം കേന്ദ്ര കമ്മിറ്റി അംഗം എളമരം കരീം എം.പി.
അഭിമന്യുവിന്റെ കൊലപാതകത്തില്‍ പ്രതിഷേധിച്ചും നാട്ടിലെ സമാധാനാന്തരീക്ഷം തകര്‍ക്കുന്ന എസ്.ഡി.പി.ഐ, കാംപസ് ഫ്രണ്ട് ഭീകരതക്കെതിരേയും സി.പി.എം തിരുവമ്പാടി ഏരിയാ കമ്മിറ്റിയുടെ നേതൃത്വത്തില്‍ നോര്‍ത്ത് കാരശ്ശേരിയില്‍ നടത്തിയ പ്രതിഷേധ കൂട്ടായ്മ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഏരിയാ സെക്രട്ടറി ടി. വിശ്വനാഥന്‍ അധ്യക്ഷനായി. ജോര്‍ജ് എം. തോമസ് എം.എല്‍.എ, ഇ. രമേശ് ബാബു, ജോളി ജോസഫ്, വി. കുഞ്ഞന്‍ മാസ്റ്റര്‍ സംസാരിച്ചു.