കോഴിക്കോട്: നിര്‍ത്തിയിട്ട ബസില്‍ നിന്നു പുക ഉയര്‍ന്നത് പരിഭ്രാന്തി പരത്തി. മൊഫ്യൂസില്‍ സ്റ്റാന്‍ഡില്‍ ഇന്നലെ വൈകുന്നേരം ആറോടെയാണ് സംഭവം.
 കോഴിക്കോട് കുറ്റ്യാടി റൂട്ടില്‍ സര്‍വിസ് നടത്തുന്ന ശ്രീ ഗോകുലം ബസ് ട്രാക്കില്‍ നിന്നു എടുക്കാനായി സ്റ്റാര്‍ട്ട് ചെയ്തപ്പോഴാണ് ഗിയര്‍ ബോക്‌സില്‍ നിന്നും പുക ഉയര്‍ന്നത്. പുക നിറഞ്ഞതോടെ ബസിലുണ്ടായിരുന്നവര്‍ ഇറങ്ങുകയായിരുന്നു. സ്റ്റാന്‍ഡില്‍ പുക ഉയര്‍ന്നതോടെ ജനങ്ങള്‍ ഭീതിയിലായി.
തുടര്‍ന്ന് ബസ് ജീവനക്കാര്‍ തന്നെ ഗിയര്‍ ബോക്‌സ് അഴിച്ചു ബാറ്ററി വയര്‍ ഇളക്കി മാറ്റിയതോടെയാണ് പുക നിന്നത്. ബാറ്ററി വയര്‍ ഷോര്‍ട്ടായതാണ് പുക ഉയരാന്‍ കാരണമെന്ന് ജീവനക്കാര്‍ പറഞ്ഞു. ബീച്ചില്‍ നിന്നു രണ്ട് യൂനിറ്റ് ഫയര്‍ ഫോഴ്‌സ് സ്ഥലത്തെത്തി.