കൊച്ചി: 39ാമത് സംസ്ഥാന സബ് ജൂനിയര്‍ ഫുട്‌ബോള്‍ ചാംപ്യന്‍ഷിപ്പിന്റെ സെമിഫൈനല്‍ ലൈനപ്പായി. എറണാകുളം അംബേദ്കര്‍ സ്‌റ്റേഡിയത്തില്‍ ഇന്നലെ നടന്ന ക്വാര്‍ട്ടര്‍ മത്സരങ്ങളില്‍ ജയിച്ച മലപ്പുറവും കണ്ണൂരും രണ്ടാം സെമിയില്‍ ഏറ്റുമുട്ടും. ആതിഥേയരായ എറണാകുളവും പാലക്കാടും തമ്മിലാണ് ആദ്യ സെമി. കോഴിക്കോടിനെ പെനാല്‍റ്റി ഷൂട്ടൗട്ടില്‍ (8-7) മറികടന്നാണ് കണ്ണൂര്‍ സെമി ഉറപ്പാക്കിയത്. നിശ്ചിത സമയത്ത് ഇരുടീമുകളും ഓരോ ഗോള്‍ വീതം നേടി തുല്യത പാലിച്ചിരുന്നു. കാസര്‍കോടിനെ എതിരില്ലാത്ത മൂന്നു ഗോളുകള്‍ക്കാണ് മലപ്പുറം തോല്‍പ്പിച്ചത്. ഇന്ന് വൈകിട്ട് മൂന്നിനാണ് ആദ്യ സെമി. രണ്ടാം സെമി നാളെ നടക്കും. ഞായറാഴ്ച്ചയാണ് ഫൈനല്‍. തൃശൂരിനെ 2-1 തോല്‍പിച്ചായിരുന്നു പാലക്കാട് സെമിയില്‍ പ്രവേശിച്ചത്.