കോഴിക്കോട്: ആദ്യഘട്ട വോട്ടെടുപ്പ് ദിനത്തില്‍ ഇന്ത്യന്‍ ജനാധിപത്യത്തിന് ആദരവുമായി ഗൂഗിള്‍.
മഷിപുരണ്ട വിരലുയര്‍ത്തിയ കൈയുടെ ഡൂഡിളാണ് ഇന്നലത്തെ ഗൂഗിള്‍ ഹോം പേജിലുണ്ടായിരുന്നത്. ഇതില്‍ ക്ലിക്ക് ചെയ്യുന്നതോടെ എങ്ങനെ വോട്ട് ചെയ്യാം എന്ന് വിശദമാക്കുന്ന ലേഖനം ഉപയോക്താക്കള്‍ക്ക് ദൃശ്യമാകുന്നു.

കൂടാതെ പോളിങ് ബൂത്തിലെ വോട്ടിങ് നടപടികള്‍, വോട്ടര്‍പട്ടികയില്‍ പേരുണ്ടോ എന്ന് എങ്ങനെ പരിശോധിക്കാം എന്നിവയും വിശദമായി നല്‍കിയിരുന്നു.സ്ഥാനാര്‍ഥികളുടെ വിവരങ്ങള്‍ എങ്ങനെ പരിശോധിക്കാം, പോളിങ് ബൂത്ത് എങ്ങനെ കണ്ടെത്താം, തിരിച്ചറിയല്‍ കാര്‍ഡുകള്‍ ഏതെല്ലാം, ഇലക്ട്രോണിക് വോട്ടിങ് മെഷീന്‍ എങ്ങനെ ഉപയോഗിക്കാം, തെരഞ്ഞെടുപ്പ് തിയതികള്‍ തുടങ്ങി വോട്ടര്‍മാര്‍ക്ക് ലഭിക്കേണ്ട വിവരങ്ങളെല്ലാം തന്നെ ഹോം പേജില്‍ ലഭ്യമായിരുന്നു. ലോകത്തെ ഏറ്റവും വലിയ തെരഞ്ഞെടുപ്പ് പ്രക്രിയയ്ക്ക് തുടക്കമായിരിക്കുന്ന സാഹചര്യത്തില്‍ ഗൂഗിളിന്റെ ആദരം വളരെ വിലയേറിയതാണ്. ജനാധിപത്യത്തെ വിശ്വാസ്യതയെ ലോകത്തിന് മുന്നില്‍ തുറന്നു കാണിക്കാനും ഇതിലൂടെ സാധിക്കും.