ജയ്പൂര്‍: രാജസ്ഥാനില്‍ സര്‍ക്കാരിനെ മറിച്ചിടാന്‍ സച്ചിന്‍ പൈലറ്റിന്റെ നേതൃത്വത്തില്‍ ശ്രമം നടന്നെന്ന വിവാദം തുടരുന്നു. പാര്‍ട്ടി എം.എല്‍.എമാരുടെ യോഗത്തില്‍ രണ്ടു പ്രാവശ്യം വിപ്പ് ലംഘിച്ച് പങ്കെടുക്കാതിരുന്നതിനെ തുടര്‍ന്ന് പൈലറ്റിനും സംഘത്തിനും സ്പീക്കര്‍ അയോഗ്യതാ നോട്ടിസ് നല്‍കിയതിനെ ചോദ്യം ചെയ്ത് വിമതര്‍ സമര്‍പ്പിച്ച ഹരജിയില്‍ രാജസ്ഥാന്‍ ഹൈക്കോടതിയില്‍ ഇന്നും വാദം തുടരും.

അയോഗ്യതയുടെ കാര്യത്തില്‍ ഇന്നു വൈകിട്ട് 5.30വരെ തീരുമാനമെടുക്കരുതെന്നു നേരത്തെ കോടതി സ്പീക്കര്‍ക്കു നിര്‍ദേശം നല്‍കിയിരുന്നു. ഇന്നലെ കോടതിയില്‍ സ്പീക്കര്‍ സി.പി ജോഷിക്കായി മുതിര്‍ന്ന അഭിഭാഷകനും കോണ്‍ഗ്രസ് നേതാവുമായ മനു അഭിഷേക് സിങ്‌വിയാണ് ഹാജരായത്. സച്ചിന്‍ പൈലറ്റ് പക്ഷത്തിനു വേണ്ടി മുതിര്‍ന്ന അഭിഭാഷകന്‍ ഹരീഷ് സാല്‍വേ ഹാജരായി. സ്പീക്കര്‍ തീരുമാനമെടുത്തതിനു ശേഷം മാത്രമേ ഇത്തരം വിഷയങ്ങളില്‍ കോടതിക്ക് ഇടപെടാനാകൂവെന്നും സ്പീക്കറുടെ തീരുമാനങ്ങള്‍ കോടതിയുടെ അധികാരപരിധിക്കു പുറത്താണെന്നും സിങ്‌വി വാദിച്ചു. താന്‍ വെറും പോസ്റ്റ്ഓഫിസോ റോബോട്ടോ ആയല്ല പ്രവര്‍ത്തിക്കുന്നതെന്നു സ്പീക്കര്‍ അഭിഭാഷകന്‍ മുഖേന അറിയിച്ചു. എന്നാല്‍, പാര്‍ട്ടി യോഗത്തില്‍ പങ്കെടുക്കാന്‍ വിപ്പ് നല്‍കാനാകില്ലെന്നും അത് അഭിപ്രായ സ്വാതന്ത്ര്യത്തിന്റെ ലംഘനമാണെന്നുമായിരുന്നു ഹരീഷ് സാല്‍വേ പറഞ്ഞത്. ഇതു പാര്‍ട്ടിയിലെ ഭിന്നതയാണെന്നും അദ്ദേഹം പറഞ്ഞു. പാര്‍ട്ടി യോഗത്തില്‍ പങ്കെടുക്കാത്തതു വിപ്പിന്റെ പരിധിയില്‍ വരില്ലെന്ന് വാദത്തിനിടെ ഹൈക്കോടതി ചീഫ് ജസ്റ്റിസ് വാക്കാല്‍ പരാമര്‍ശിച്ചിട്ടുമുണ്ട്. ഇന്നു സച്ചിന്‍ പക്ഷത്തിനായി അഭിഭാഷകന്‍ മുകുള്‍ റോഹത്ഗി ഹാജരാകുമെന്നാണ് വിവരം.

അതേസമയം, രാജസ്ഥാന്‍ വിഷയത്തില്‍ രാജസ്ഥാന്‍ ഹൈക്കോടതിയില്‍ നടക്കുന്ന വാദങ്ങള്‍ ഇന്നലെ സുപ്രിംകോടതിയിലും കേട്ടു. സ്പീക്കര്‍ക്കുവേണ്ടി വിഡിയോ കോണ്‍ഫറന്‍സിലൂടെ ഹാജരായ മുതിര്‍ന്ന അഭിഭാഷകന്‍ മനു അഭിഷേക് സിങ്‌വി മൈക്രോഫോണ്‍ ഓഫാക്കാന്‍ മറന്നതോടെയാണ് വാദം സുപ്രിംകോടതിയില്‍ കേട്ടത്. സുപ്രിംകോടതിയില്‍ മറ്റൊരു കേസിലും ഇദ്ദേഹം വിഡിയോ കോണ്‍ഫറന്‍സില്‍ ഉണ്ടായിരുന്നു. ഇതോടെ, സുപ്രിംകോടതിയില്‍ രാജസ്ഥാനിലെ വാദങ്ങള്‍ കേള്‍ക്കുന്നതായി പറഞ്ഞ അഭിഭാഷകന്‍ മുകുള്‍ റോഹത്ഗി, സിങ്‌വിയോട് മൈക്ക് ഓഫാക്കാന്‍ ആവശ്യപ്പെടുകയും ചെയ്തു.