ന്യൂഡല്‍ഹി: കടുത്ത സാമ്പത്തിക പ്രതിസന്ധിയെ തുടര്‍ന്ന് ജെറ്റ് എയര്‍വേയ്‌സ് ഇന്നലെയും ഇന്നുമുള്ള അന്താരാഷ്ട്ര സര്‍വിസുകള്‍ റദ്ദാക്കി. ആംസ്റ്റര്‍ഡാം, പാരിസ്, ലണ്ടന്‍ എന്നിവിടങ്ങളിലേക്കടക്കമുള്ള വിമാന സര്‍വിസുകള്‍ രണ്ടു ദിവസത്തേയ്ക്കു റദ്ദാക്കിയതായി എന്‍.ഡി.ടി.വി റിപോര്‍ട്ട് ചെയ്തു.
ഒരു യൂറോപ്യന്‍ കാര്‍ഗോ കമ്പനിക്കു വന്‍ തുക നല്‍കാനുള്ളതിനെ തുടര്‍ന്നു ജെറ്റ് എയര്‍വേയ്‌സിന്റെ ഒരു വിമാനം കഴിഞ്ഞ ദിവസം ആംസ്റ്റര്‍ഡാം വിമാനത്താവളത്തില്‍വച്ച് ജപ്തി ചെയ്തിരുന്നു.

മുംബൈയില്‍നിന്ന് ആംസ്റ്റര്‍ഡാമിലേക്കു പോയ ബോയിങ് 777-300 വിമാനമാണ് ജപ്തി ചെയ്തത്.
കടുത്ത സാമ്പത്തിക ബാധ്യതയിലുള്ള ജെറ്റ് എയര്‍വെയ്‌സ് കമ്പനിയുടെ 123 വിമാനങ്ങളില്‍ 14 എണ്ണം മാത്രമാണ് നിലവില്‍ സര്‍വിസ് നടത്തുന്നത്. സാമ്പത്തിക പ്രശ്‌നങ്ങളെ തുടര്‍ന്നു ജീവനക്കാര്‍ക്കു കൃത്യമായി ശമ്പളം നല്‍കാനും കമ്പനിക്കു സാധിച്ചിരുന്നില്ല. ഇതേതുടര്‍ന്ന് ഒരു വിഭാഗം പൈലറ്റുമാര്‍ കമ്പനിക്കു വക്കീല്‍ നോട്ടിസ് അയച്ചിരുന്നു.