കൊളത്തൂര്‍: അങ്ങാടിപ്പുറം കൊളത്തൂര്‍ റൂട്ടില്‍ മാലാപറമ്പ് ക്രിസ്തീയ ദേവാലയത്തിനു സമീപത്ത് നിയന്ത്രണംവിട്ട ബൊലോറോ ജീപ്പ് രണ്ടു കാറുകളിലിടിച്ച് താഴ്ച്ചയിലേക്ക് മറിഞ്ഞു. ഇന്നലെ ഉച്ചയ്ക്ക് 12.45നാണ് അപകടം.
അത്തിപ്പറ്റ ഭാഗത്തു നിന്നും മാലാപറമ്പിലെ ആശുപത്രിയിലേക്ക് പോകുന്നതിനിടെ ക്രിസ്തീയ ദേവാലയത്തിനു സമീപത്തെ അപകട വളവില്‍ വേഗതയിലെത്തിയ ജീപ്പ് പെരിന്തല്‍മണ്ണ ഭാഗത്തു നിന്നും കൊളത്തൂരിലേക്ക് വരികയായിരുന്ന കാറില്‍ ഇടിക്കുകയായിരുന്നു. ഇടിയുടെ ആഘാതത്തില്‍ കാര്‍ വട്ടം കറങ്ങി എതിര്‍ദിശയിലാണ് നിന്നത്.
കാറിനു തൊട്ടുപിറകിലുണ്ടായിരുന്ന മറ്റൊരു കാറില്‍ ഇടിച്ചശേഷം റോഡരികിലെ പത്തടിയോളം താഴ്ച്ചവരുന്ന ഭാഗത്തേക്ക് ജീപ്പ് മറിയുകയായിരുന്നു. അപകടത്തില്‍ പേടിച്ചുവിരണ്ട കാര്‍ യാത്രികരും, സമീപത്തെ ജോലിക്കാരും ചേര്‍ന്നാണ് ജീപ്പിലുണ്ടായിരുന്ന യാത്രക്കാരെനെ പുറത്തെടുത്തത്. തുടര്‍ന്ന് പെരിന്തല്‍മണ്ണയില്‍ നിന്നെത്തിയ ക്രെയിന്‍ സര്‍വിസിന്റെ ഏറെ നേരത്തെ പരിശ്രമത്തിനൊടുവിലാണ് വാഹനം താഴ്ച്ചയില്‍ നിന്നും കയറ്റിയത്.