ഒരു കൂട്ടം ജനങ്ങളില്‍ വലിയൊരു ഭാഗത്തെയും ഒരു രോഗം ബാധിക്കുകയും അവരില്‍ ആ രോഗത്തെ പ്രതിരോധിക്കാനുള്ള ശേഷി രൂപപ്പെടുകയും ചെയ്യുന്ന അവസ്ഥയാണ് ഹെര്‍ഡ് ഇമ്മ്യൂണിറ്റി. ജനങ്ങളില്‍ നല്ലൊരു ശതമാനം ആളുകളെ രോഗം ബാധിക്കാന്‍ അനുവദിക്കുകയും അവരുടെ രോഗം ഭേദമാക്കുകയും ചെയ്യുന്നതിലൂടെ രോഗത്തിനെതിരെ സമൂഹം സ്വാഭാവികമായി രോഗപ്രതിരോധ ശേഷി കൈവരിക്കുന്നു.

ജനസംഖ്യയിലെ നിശ്ചിത ഭാഗത്തിന് രോഗം വന്നാലാണ് ഹെര്‍ഡ് ഇമ്മ്യൂണിറ്റി സംഭവിക്കുക. ഇത് ഓരോ രോഗത്തിനും വ്യത്യസ്തമായിരിക്കും, അഞ്ചാം പനി ഒരു ജനസംഖ്യയുടെ 95 ശതമാനത്തിനു ബാധിച്ചാല്‍ അവിടെ ഹെര്‍ഡ് ഇമ്മ്യൂണിറ്റി ഉണ്ടാവും. എന്നാല്‍ വൈറല്‍ പകര്‍ച്ച വ്യാധികള്‍ ജനസംഖ്യയുടെ 35 ശതമാനത്തിനു ബാധിച്ചാല്‍ ഹെര്‍ഡ് ഇമ്മ്യൂണിറ്റിയാവും. ഇറാനില്‍ രണ്ടര കോടി പേര്‍ക്ക് കൊവിഡ് ബാധിച്ചെന്ന പ്രസിഡന്റ് ഹസന്‍ റുഹാനിയുടെ പ്രസ്താവന ശരിയാണെങ്കില്‍ അവിടെ ഹെര്‍ഡ് ഇമ്മ്യൂണിറ്റി സംഭവിച്ചുകഴിഞ്ഞിട്ടുണ്ടാവുമെന്ന് വിദഗ്ധര്‍ പറഞ്ഞിരുന്നു. 

നേരത്തെ ശാസ്ത്രലോകം കൊവിഡിനെതിരെയുള്ള ഒരു പ്രതിരോധ മാര്‍ഗമായി ഹെര്‍ഡ് ഇമ്മ്യൂണിറ്റി ആലോചിച്ചിരുന്നു. ബ്രിട്ടന്‍, സ്‌പെയിന്‍, ഇംഗ്ലണ്ട് തുടങ്ങിയ രാജ്യങ്ങള്‍ ആദ്യ ഘട്ടത്തില്‍ എല്ലാവര്‍ക്കും പ്രതിരോധശേഷി വരട്ടെ എന്ന അര്‍ത്ഥത്തില്‍ ഹെര്‍ഡ് ഇമ്മ്യൂണിറ്റിക്ക് അനുകൂലമായ നയമെടുത്തിരുന്നു. എന്നാല്‍ മരണസംഖ്യ കൂടിയതോടെയാണ് അവര്‍ പിന്തിരിയുകയായിരുന്നു.