ചെന്നൈ: ബി.ജെ.പിയുടെ വിദ്യാര്‍ഥി വിഭാഗമായ എ.ബി.വി.പിയുടെ ദേശീയ പ്രസിഡന്റ് ഡോ. സുബ്ബയ്യ ഷണ്‍മുഖനെതിരേ ആരോപണവുമായി ഇയാളുടെ അയല്‍വാസിയായ സ്ത്രീ രംഗത്ത്. തന്നെ ഫോണില്‍ വിളിച്ച് ഭീഷണിപ്പെടുത്തുന്നെന്നും വീടിന്റെ പൂമുഖത്ത് മൂത്രമൊഴിക്കുന്നുവെന്നുമാണ് സ്ത്രീയുടെ പരാതി. ഇതിന്റെ സി.സി.ടി.വി ദൃശ്യങ്ങള്‍ ഉള്‍പ്പെടെ പരാതി നല്‍കിയിട്ടും പൊലിസ് എഫ്.ഐ.ആര്‍ രജിസ്റ്റര്‍ ചെയ്തില്ലെന്നും 52കാരിയായ സ്ത്രീ ആരോപിക്കുന്നു.

ഇരു വിഭാഗവും അടുത്തടുത്ത അപ്പാര്‍ട്ട്‌മെന്റുകളിലാണ് താമസിക്കുന്നത്. സ്ത്രീയുടെ കാര്‍ പാര്‍ക്കിങ് ഏരിയ സുബ്ബയ്യ ഷണ്‍മുഖനും ഉപയോഗിച്ചിരുന്നു. ഇതിനു വാടക ആവശ്യപ്പെട്ടതോടെയാണ് ഭീഷണി തുടങ്ങിയതെന്നു സ്ത്രീ പറയുന്നു. ഇതിനു പിന്നാലെ സ്ത്രീയുടെ വീടിന്റെ പൂമുഖത്ത് സുബ്ബയ്യ മാസ്‌ക് ധരിച്ച് മൂത്രമൊഴിക്കുന്നതിന്റെ സി.സി.ടി.വി ദൃശ്യങ്ങളും പുറത്തായിട്ടുണ്ട്. 

സര്‍ക്കാര്‍ ഉദ്യോഗസ്ഥന്‍കൂടിയായ സുബ്ബയ്യയുടെ ഈ പ്രവൃത്തിക്കെതിരേ പൊലിസ് എഫ്.ഐ.ഐര്‍ രജിസ്റ്റര്‍ ചെയ്തിട്ടില്ലെന്ന് സ്ത്രീയും കുടുംബവും ആരോപിക്കുമ്പോള്‍, എഫ്.ഐ.ആര്‍ രജിസ്റ്റര്‍ ചെയ്യാന്‍ അവര്‍ ആവശ്യപ്പെട്ടിരുന്നില്ലെന്നും പരാതി ഒത്തുതീര്‍പ്പാക്കാന്‍ ശ്രമം നടക്കുകയാണെന്നുമാണ് ചെന്നൈ ആടാംബാക്കം പൊലിസിന്റെ വിശദീകരണം. 

സ്ത്രീക്കെതിരേ പൊലിസ് നിര്‍ദേശപ്രകാരം സുബ്ബയ്യയും പരാതി നല്‍കിയതായും വിവരമുണ്ട്. ദൃശ്യങ്ങള്‍ വ്യാജമാണെന്നാണ് അദ്ദേഹം ആരോപിക്കുന്നത്.