തിരൂര്‍: പൊലിസ് ലൈന്‍ ട്രഞ്ചിങ് ഗ്രൗണ്ട് റോഡില്‍ പൊലിസ് പിടിച്ചെടുത്ത വാഹനങ്ങള്‍ക്ക് തീപിടിച്ചു. ഇന്നലെ വൈകിട്ട് മൂന്ന് മണിയോടെയാണ് സംഭവം. നാല് വാഹനങ്ങള്‍ കത്തിനശിച്ചു. മൂന്ന് ലോറികളും ഒരു കാറുമാണ് കത്തിനശിച്ചത്. വാഹനങ്ങള്‍ നിര്‍ത്തിയിട്ട സ്ഥലത്തെ ഉണങ്ങിയ പുല്ലിന് തീപിടിച്ചതാണ് വാഹനത്തിലേക്ക് തീ പടരാന്‍ ഇടയാക്കിയത്. കാല്‍നട യാത്രക്കാരും വാഹനങ്ങളും കടന്നുപോകുന്ന സ്ഥലമാണിവിടെ. തിരൂരില്‍ നിന്നുള്ള രണ്ട് യൂനിറ്റ് ഫയര്‍ഫോഴ്‌സെത്തി തീയണച്ചത് വലിയ ദുരന്തം ഒഴിവാക്കി. സ്റ്റേഷന്‍ ഓഫിസര്‍ എം.കെ പ്രമോദ് കുമാര്‍, ലീഡിങ് ഫയര്‍ ഓഫിസര്‍ പി. മുരളീധരന്‍, ഫയര്‍മാന്‍മാരായ ഗിരീഷ്, മുകേഷ്, രതീഷ്, കൃഷ്ണകുമാര്‍, അരുണ്‍, ഹോം ഗാര്‍ഡ് മണികണ്ഠന്‍, സലാം, മധുപ്രസാദ് എന്നിവരടങ്ങുന്ന ഫയര്‍ഫോഴ്‌സ് സംഘമാണ് തീയണച്ചത്.