ഹരിപ്പാട്: നിയന്ത്രണം വിട്ട പിക്കപ്പ് വാന്‍ കടയിലേക്ക് പാഞ്ഞുകയറി രണ്ടു പേര്‍ക്ക് പരുക്ക്. ദേശീയപാതയില്‍ കരുവാറ്റാ ടി.ബി ക്ലിനിക് ജംഗ്ഷനില്‍ ഇന്നലെ ഉച്ചകഴിഞ്ഞ് മൂന്നുമണിയോടെയാണ് സംഭവം.
തെക്കു നിന്നും ആലപ്പുഴ ഭാഗത്തേയ്ക്കു വന്ന പിക്കപ്പ്‌വാനും തൃശ്ശൂരില്‍ നിന്നും തിരുവന്തപുരത്തിന് പോകുകയായിരുന്ന പാഴ്‌സല്‍ കമ്പനിയുടെ വാനും തമ്മിലാണ് ആദ്യം കൂട്ടി മുട്ടിയത്.ഇരു വാഹനങ്ങളും അമിതവേഗത്തിലായിരുന്നെന്ന് ദൃക്‌സാക്ഷികള്‍ പറയുന്നു.ആലപ്പുഴ ഭാഗത്തേയ്ക്ക് വന്ന വാന്‍ സ്‌കൂട്ടര്‍ യാത്രക്കാരായ കായംകുളം മാളിയേക്കല്‍ കിഴക്കതില്‍ അഷറഫ്(59) ,ഭാര്യ നസീമ(48) എന്നിവരെ ഇടിച്ചുതെറിപ്പിച്ച് തൊട്ടടുത്ത ബാര്‍ബര്‍ ഷോപ്പിലേക്ക് പാഞ്ഞുകയറുകയായിരുന്നു. ബാര്‍ബര്‍ ഷോപ്പില്‍ കുട്ടിയുടെ മുടി മുറിച്ചു കൊണ്ടിരുന്ന ഉടമസ്ഥന്‍ ഹുസൈനും കുട്ടിയും അത്ഭുതകരമായാണ് രക്ഷപ്പെട്ടത്.കടയ്ക്ക് മുന്‍വശം പാര്‍ക്ക് ചെയ്തിരുന്ന ബൈക്കും കൊരുത്താണ് വാന്‍ ഉള്ളിലേക്ക് പാഞ്ഞുകയറിയത്.ഇടിയുടെ ആഘാതത്തില്‍ കടയുടെ മുന്‍വശം ഏതാണ്ട് പൂര്‍ണ്ണമായും തകര്‍ന്നു.ഹരിപ്പാട് പൊലീസ് എത്തി മേല്‍നടപടികള്‍ സ്വീകരിച്ചു.