ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ കിരീടപ്പോരാട്ടത്തിന് പുറമെ ആദ്യ നാലിലെത്താനുള്ള പോരാട്ടവും ശക്തമാകുന്നു. ഇന്നലെ നടന്ന മത്സരത്തില്‍ ലീഗിലെ അവസാന സ്ഥാനക്കാരായ ഹഡേഴ്‌സ്ഫീല്‍ഡിനെ എതിരില്ലാത്ത നാലു ഗോളുകള്‍ക്കാണ് ടോട്ടനം തകര്‍ത്ത് വിട്ടത്. നാലില്‍ മൂന്നു ഗോളുകളും ബ്രസീലിയന്‍ താരമായ ലൂകാസ് മോറയുടെ വകയായിരുന്നു.

ഇതോടെ പ്രീമിയര്‍ ലീഗില്‍ ഹാട്രിക് നേടുന്ന നാലാമത്തെ ബ്രസീലിയനായി ലൂകാസ് മോറ മാറി. ഹാരി കെയ്ന്‍ ഇല്ലാതെ ആണ് സ്പര്‍സ് ഇന്നലെ ഇറങ്ങിയതെങ്കിലും ക്യാപ്റ്റന്റെ കുറവ് ഒട്ടും കാണിക്കാതെയായിരുന്നു ടോട്ടനത്തിന്റെ പ്രകടനം. തുടക്കം മുതല്‍ ആക്രമിച്ചു കളിച്ച ടോട്ടനത്തെ വിക്ടര്‍ വന്യാമ ആയിരുന്നു മുന്നില്‍ എത്തിച്ചത്. പിന്നീട് 27, 87, 90 മിനുട്ടുകളില്‍ ആയിരുന്നു മോറയുടെ ഗോളുകള്‍.

ജയത്തോടെ ടോട്ടനത്തിന് ലീഗില്‍ 33 മത്സരങ്ങളില്‍നിന്ന് 66 പോയിന്റായി. ചെല്‍സിയെ മറികടന്ന് മൂന്നാമതെത്താനും സ്പര്‍സിനായി. ആറാം സ്ഥാനത്തുള്ള മാഞ്ചസ്റ്ററും അഞ്ചാം സ്ഥാനത്തുള്ള ആഴ്‌സനലും ആദ്യ നാലില്‍ ഉള്‍പ്പെടാനുള്ള പോരാട്ടത്തിലാണ്.

ലീഗിലെ മറ്റു മത്സരങ്ങളില്‍ ന്യൂകാസില്‍ യുനൈറ്റഡ് എതിരില്ലാത്ത ഒരു ഗോളിന് ലെസ്റ്റര്‍ സിറ്റിയെ പരാജയപ്പെടുത്തിയപ്പോള്‍ ബേണ്‍മൗത്ത് ബ്രൈട്ടനെ ഏകപക്ഷീയമായ അഞ്ച് ഗോളുകള്‍ക്ക് തകര്‍ത്തു. വോള്‍വ്‌സ് സൗത്താംപ്ടനോട് ഒന്നിനെതിരേ മൂന്ന് ഗോളുകള്‍ക്ക് പരാജയപ്പെട്ടപ്പോള്‍ ഫുള്‍ഹാം എവര്‍ട്ടനെ രണ്ട് ഗോളിന് അട്ടിമറിച്ചു. ബേണ്‍ലി കാര്‍ഡിഫ് സിറ്റിയെ രണ്ട് ഗോളിനും തോല്‍പ്പിച്ചു.