മാഡ്രിഡ്: എല്‍ ക്ലാസ്സിക്കോ പോരാട്ടത്തിന് ശേഷം നടന്ന ലാ ലിഗ മത്സരങ്ങളില്‍ ബാഴ്‌സലോണയും റയല്‍ മാഡ്രിഡും ഗോള്‍ മഴ വര്‍ഷിച്ച് വിജയം പിടിച്ചു. ബാഴ്‌സലോണ ഓസാസുനയെ ഒന്നിനെതിരേ ഏഴ് ഗോളുകള്‍ക്ക് തകര്‍ത്തെറിഞ്ഞപ്പോള്‍ റയല്‍ ഡിപോര്‍ടീവോ ലാ കൊരുണയെ രണ്ടിനെതിരേ ആറ് ഗോളുകള്‍ക്കാണ് വീഴ്ത്തിയത്.
എല്‍ ക്ലാസ്സിക്കോയില്‍ അവസാന നിമിഷം ഗോള്‍ നേടി ടീമിനെ പോയിന്റ് പട്ടികയില്‍ ഒന്നാം സ്ഥാനത്തേക്ക് കയറ്റിയ ലയണല്‍ മെസ്സി മികച്ച ഫോം തുടര്‍ന്ന് ഒസാസുനയെ തകര്‍ക്കുന്നതിലും മുന്നില്‍ നിന്നു. ഇരട്ട ഗോളുകള്‍ നേടിയ മെസ്സിയുടെ കരുത്തിലാണ് ബാഴ്‌സയുടെ ഉജ്ജ്വല വിജയം. മെസ്സിക്ക് പുറമേ ആന്ദ്രെ ഗോമസ്, പാക്കോ അല്‍ക്കസര്‍ എന്നിവരും ഇരട്ട ഗോള്‍ നേടി. കളിയുടെ 12, 61 മിനുട്ടുകളിലാണ് മെസ്സി വല ചലിപ്പിച്ചത്. ആന്ദ്രെ ഗോമസ് 30, 57 മിനുട്ടുകളിലും പാക്കോ അലക്കസര്‍ 64, 86 മിനുട്ടുകളിലുമാണ് വല കുലുക്കിയത്. ശേഷിച്ച ഒരു ഗോള്‍ മഷറാനോയുടെ വകയായിരുന്നു. ആദ്യ പകുതിയില്‍ രണ്ടും രണ്ടാം പകുതിയില്‍ അഞ്ചും ഗോളുകളാണ് ഒസാസുനയുടെ വലയില്‍ കയറിയത്. 48ാം മിനുട്ടില്‍ റോബര്‍ട്ടോ ടോറസിലൂടെ ഒസാസുന ഒരു ഗോള്‍ മടക്കി.
സ്വന്തം തട്ടകത്തില്‍ ചിരവൈരികളായ ബാഴ്‌സയോടേറ്റ അപ്രതീക്ഷിത തോല്‍വിയും അതുവഴി ഒന്നാം സ്ഥാനം പോയതിന്റേയും ക്ഷീണത്തില്‍ കളിക്കാനിറങ്ങിയ റയല്‍ ആ കലിപ്പ് തീര്‍ത്തത് ഡിപോര്‍ടീവോ ലാ കൊരുണയുടെ നെഞ്ചത്ത്. രണ്ടിനെതിരേ ആറ് ഗോളുകളാണ് എതിരാളിയുടെ വലയില്‍ റയല്‍ നിക്ഷേപിച്ചത്. സിദാന്‍ കോച്ചായതിന് ശേഷം ആദ്യ ഇലവനില്‍ പലപ്പോഴും സ്ഥാനമില്ലാതിരുന്ന ജെയിംസ് റോഡ്രിഗസ് ഇത്തവണ തുടക്കം മുതല്‍ ടീമിലിടം പിടിച്ചു. ക്രിസ്റ്റ്യാനോ റൊണാള്‍ഡോയടക്കമുള്ള മന്‍നിര താരങ്ങള്‍ക്കെല്ലാം വിശ്രമം അനുവദിച്ചപ്പോഴാണ് റോഡ്രിഗസ് ആദ്യ ഇലവനില്‍ സ്ഥാനം കണ്ടത്. ആ അവസരം ഇരട്ട ഗോള്‍ നേടിയാണ് താരം ആഘോഷിച്ചത്.
കളിയുടെ 14, 66 മിനുട്ടുകളിലായിരുന്നു റോഡ്രിഗസിന്റെ ഗോളുകള്‍. കളി തുടങ്ങി ഒന്നാം മിനുട്ടില്‍ ആല്‍വരോ മൊറാറ്റയിലൂടെ ലീഡ് എടുത്ത് ഗോള്‍ അടി തുടങ്ങിയ റയലിനെ 14ാം മിനുട്ടില്‍ റോഡ്രിഗസ് രണ്ടാം ഗോളിലൂടെ മുന്നോട്ട് നയിച്ചു. 35ാം മിനുട്ടില്‍ ഡിപോര്‍ടീവോ ഒരു ഗോള്‍ മടക്കി. 44ാം മിനുട്ടില്‍ ലൂക്കാസ് വാസ്‌ക്വസ് മൂന്നാം ഗോളിലൂടെ റയലിന്റെ ലീഡുയര്‍ത്തി. രണ്ടാം പകുതിയില്‍ 66ല്‍ റോഡ്രിഗസ്, 77ല്‍ ഇസ്‌ക്കോ എന്നിവരും വല ചലിപ്പിച്ചു. 84ാം മിനുട്ടില്‍ ഡിപോര്‍ടീവോ ഒരു ഗോള്‍ കൂടി മടക്കിയെങ്കിലും 87ാം മിനുട്ടില്‍ കസെമിറോയിലൂടെ റയല്‍ ആറാം ഗോളും വലയിലാക്കി വിജയമാഘോഷിച്ചു.
ജയത്തോടെ 34 കളികളില്‍ നിന്ന് 68 ഗോള്‍ ശരാശരിയില്‍ ബാഴ്‌സലോണ ഒന്നാം സ്ഥാനത്ത്. 33 മത്സരങ്ങളില്‍ നിന്ന് 52 ഗോള്‍ ശരാശരിയില്‍ 78 പോയിന്റുമായി റയല്‍ മാഡ്രിഡ് രണ്ടാം സ്ഥാനത്ത്.
മറ്റു മത്സരങ്ങളില്‍ ലെഗാനസ് 3-0ത്തിന് ലാസ് പല്‍മാസിനെ പരാജയപ്പെടുത്തിയപ്പോള്‍ വലന്‍സിയയെ 2-3ന് റയല്‍ സോസിഡാഡ് കീഴടക്കി.

.