ഉരുവച്ചാല്‍: ഡെങ്കിപ്പനി ഭീഷണിയെ തുടര്‍ന്ന് ഉരുവച്ചാല്‍ ടാക്‌സി സ്റ്റാന്റില്‍ പ്രവര്‍ത്തിക്കുന്ന മട്ടന്നൂര്‍ നഗരസഭയുടെ നിയന്ത്രണത്തിലുള്ള പൊതുശൗചാലയം ആരോഗ്യ വിഭാഗം അടച്ചുപൂട്ടി. കഴിഞ്ഞ ദിവസം രാവിലെ നഗരസഭ ക്ലീനിങ് തൊഴിലാളികളെത്തിയാണ് സമീപത്ത് പ്രവര്‍ത്തിക്കുന്ന മൂത്രപ്പുരയടക്കം അടച്ചുപൂട്ടിയത്.
അഞ്ച് മാസമായി സെഫ്റ്റിക്ക് ടാങ്ക് നിറഞ്ഞ് കക്കൂസിന്റെ രണ്ട് ക്ലോസറ്റിലും കൂടി മലിനജലം പുറത്തേക്ക് ഒഴുകുന്നുണ്ടായിരുന്നു. ടാക്‌സി സ്റ്റാന്റിലെത്തുന്ന നൂറുക്കണക്കിന് ജനങ്ങള്‍ ദുര്‍ഗന്ധം കാരണം മൂക്ക് പൊത്തിയാണ് ഇതുവഴി കടന്നുപോയിരുന്നത്. കൂടാതെ കക്കൂസിന്റ 10 മീറ്റര്‍ ചുറ്റളവിലാണ് നഗരസഭയുടെ പൊതുകിണറുള്ളത്. ഒരു മാസം മുന്‍പ് നഗരസഭ ക്ലീനിങ് തൊഴിലാളികളെത്തി കക്കൂസ് താല്‍ക്കാലികമായി വൃത്തിയാക്കിയിരുന്നുവെങ്കിലും വീണ്ടും ടാങ്ക് നിറഞ്ഞ് മലിനജലം പുറത്തേക്ക് ഒഴുകുകയായിരുന്നു. സെഫ്റ്റിക് ടാങ്ക് നിര്‍മിച്ചതിലുള്ള അപാകതയാണ് ടാങ്ക് നിറഞ്ഞ് മലിനജലം പുറത്തേക്ക് ഒഴുകാന്‍ കാരണമായതെന്നു നാട്ടുകാര്‍ പറയുന്നു.