കൊച്ചി: വിഷു, ഈസ്റ്റര്‍ ആഘോഷങ്ങള്‍ക്കായി നഗരത്തില്‍ വില്‍പ്പനയ്‌ക്കെത്തിച്ച ഹാഷിഷും, കഞ്ചാവുമായി രണ്ടുപേര്‍ കൊച്ചി സിറ്റി ഷാഡോ പൊലിസിന്റെ പിടിയില്‍. തൃശ്ശൂര്‍ വെളിയംകോട്ട് വടക്കേപ്പുറത്ത് വീട്ടില്‍ അഫ്‌സല്‍(24), ബംഗാള്‍ സ്വദേശി ആദിശങ്കര്‍(24) എന്നിവരാണ് പിടിയിലായത്.
അഫ്‌സലിന്റെ കൈയില്‍ നിന്നും 30 ഗ്രാം ഹാഷിഷും ആദിശങ്കറിന്റെ കൈയില്‍ നിന്നും 200 ഗ്രാം കഞ്ചാവുമാണ് പൊലീസ് പിടികൂടിയത്. ലഹരിമരുന്ന് വിപണിയില്‍ ഏകദേശം ഒരു ലക്ഷത്തോളം രൂപ വിലവരുന്ന ലഹരി മരുന്നാണിതെന്ന് പൊലിസ് അറിയിച്ചു. നഗരത്തിലെ ഒരു മള്‍ട്ടിപ്ലെക്‌സ് തിയറ്ററില്‍ വെച്ച് ഉപഭോക്താക്കള്‍ക്ക് ലഹരി വസ്തുക്കള്‍ കൈമാറുകയായിരുന്നു അഫ്‌സല്‍ ചെയ്തിരുന്നത്.
നാലായിരം രൂപയോളം വരുന്ന അഞ്ച് ഗ്രാമിന്റെ നിരവധി പാക്കറ്റ് ഹാഷിഷ് ഇയാളില്‍ നിന്നും പൊലീസ് കണ്ടെടുത്തു. ഇന്‍ഫോപാര്‍ക്ക് പരിസരത്ത് കഞ്ചാവ് കച്ചവടം നടത്തുന്നതിനിടയിലാണ് ആദിശങ്കര്‍ ഷാഡോസംഘത്തിന്റെ പിടിയിലായത്.
പ്രധാനമായും ടാക്‌സി ഡ്രൈവര്‍മാര്‍ക്കാണ് ഇയാള്‍ കഞ്ചാവ് കൈമാറിയിരുന്നത്. വിഷു, ഈസ്റ്റര്‍ ആഘോഷങ്ങള്‍ക്ക് നഗരത്തിലേക്ക് വന്‍തോതില്‍ ലഹരിമരുന്നുകള്‍ എത്തിച്ചേരുമെന്ന് സിറ്റി പൊലിസ് കമ്മിഷണര്‍ എസ്. സുരേന്ദ്രന്‍ ആവിഷ്‌ക്കരിച്ച ഓപ്പറേഷന്‍ കിങ് കോബ്ര കണക്ട് ടു കമ്മിഷ്ണര്‍ പദ്ധതിലേക്ക് ലഭിച്ച രഹസ്യ വിവരത്തെ തുടര്‍ന്നായിരുന്നു പൊലിസ് നടപടി.
കമ്മിഷണറുടെ നിര്‍ദ്ദേശപ്രകാരം സ്‌പെഷ്യല്‍ ബ്രാഞ്ച് എ.സി.പി എസ്.ടി സുരേഷ് കുമാറിന്റെ നേതൃത്വത്തില്‍ ഷാഡോ സംഘം ഒരേ സമയം രണ്ടുഭാഗങ്ങള്‍ കേന്ദ്രീകരിച്ച് നടത്തിയ തിരച്ചിലില്‍ ആണ് പ്രതികള്‍ പിടിയിലായത്.