കോഴിക്കോട്: വീടിന് തറയും ചുമരും കെട്ടലോ പെയിന്റിങ്ങോ ആശാരിപ്പണിയോ ടൈല്‍ വിരിക്കലോ എന്തുമാകട്ടെ ഇനി ജോലിക്കാരെ അന്വേഷിച്ച് ബുദ്ധിമുട്ടേണ്ട. എല്ലാം ഇനി നമ്മുടെ വിരല്‍തുമ്പില്‍ ലഭ്യമാവും. വീട് നിര്‍മാണവുമായി ബന്ധപ്പെട്ട ജോലികള്‍ ചെയ്യുന്നവരെ വിരല്‍തുമ്പില്‍ ലഭ്യമാക്കി കോഴിക്കോട്ടെ യുവാക്കളുടെ കൂട്ടായ്മയാണ് സെര്‍വ് ഈസി മൊബൈല്‍ ആപ്പുമായി രംഗത്തെത്തിയിരിക്കുന്നത്. എല്ലാ വിധത്തിലുള്ള സേവന ദാതാക്കളെയും അവരുടെ ക്ലയിന്റ്‌സുമായി ബന്ധിപ്പിക്കുന്ന ഒരു സൗജന്യ മൊബൈല്‍ ആപ്ലിക്കേഷന്‍ ആണ് സെര്‍വ് ഈസി. ജോലിക്കാരെ കണ്ടെത്താന്‍ മാത്രമല്ല ജോലി തേടി നടക്കുന്നവര്‍ക്കും ഉപകാരപ്രദമാണ് ഈ ആപ്പ്.
വളരെ ലളിതമാണ് അപ്പിന്റെ ഉപയോഗം. സെര്‍വ് ഈസി മൊബൈല്‍ ആപ്പ് ഗൂഗിള്‍ പ്ലേ സ്റ്റോറില്‍ നിന്നും ഡൗണ്‍ലോഡ് ചെയ്ത ശേഷം നമ്മുടെ ആവശ്യമെന്താണെന്ന് അവിടെ ടൈപ്പ് ചെയ്ത് നല്‍കുക. ഈ സന്ദേശം നമുക്ക് ചുറ്റുമുള്ള സേവന ദാതാക്കള്‍ക്ക് സെര്‍വ്ഈസി കൈമാറും. പിന്നീട് സേവന ദാതാക്കളുടെ വിവരങ്ങള്‍ ലഭ്യമാവുകയും അവരുടെ നിരക്ക്, ലഭ്യത, റേറ്റിങ് എന്നിവ അടിസ്ഥാനമാക്കി ഏറ്റവും മികച്ചയാളെ നമുക്ക് തെരഞ്ഞെടുക്കാനും കഴിയും. തെരഞ്ഞെടുത്ത ശേഷം അവരുമായി നേരിട്ട് ഫോണിലൂടെയോ വാട്‌സ് ആപ്പ് വഴിയോ നമുക്ക് ബന്ധപ്പെടാനുള്ള സൗകര്യവും ആപ്പ് ഒരുക്കിയിട്ടുണ്ട്.
കൂടാതെ വേണ്ടത്ര ആളുകളും സൗകര്യങ്ങളും ഉണ്ടായിട്ടും ജോലിയില്ലാതെ ഇരിക്കുന്ന നിര്‍മാണ രംഗത്തെ കമ്പനികള്‍ക്കും വ്യക്തികള്‍ക്കും സെര്‍വ് ഈസിയിലൂടെ തന്നെ ജോലി കണ്ടെത്താം. ആപ്ലിക്കേഷന്‍ ഡൗണ്‍ലോഡ് ചെയ്ത ശേഷം സ്ഥലവും നല്‍കുന്ന സേവനങ്ങളും ആപ്പില്‍ രജിസ്റ്റര്‍ ചെയ്യുക. ആവശ്യക്കാരില്‍ നിന്ന് നിങ്ങള്‍ നല്‍കുന്ന സേവനങ്ങള്‍ക്കുള്ള റിക്വസ്റ്റുകള്‍ കിട്ടിത്തുടങ്ങും.
കൂടാതെ പണിപൂര്‍ത്തിയായാല്‍ ഉപഭോക്താക്കള്‍ നിങ്ങള്‍ ചെയ്യുന്ന ജോലിയില്‍ സംതൃപ്തരാണോയെന്നും രേഖപ്പെടുത്തും. ഇതുവഴി രജിസ്റ്റര്‍ ചെയ്തിരിക്കുന്ന സേവന ദാതാക്കളെക്കുറിച്ചുള്ള വിലയിരുത്തലും ആപ്പിന്റെ ഉപയോക്താക്കള്‍ക്ക് ലഭിക്കും.