കോഴിക്കോട്: ജ്യൂസ് കടകളില്‍ ഭക്ഷ്യസുരക്ഷാ വകുപ്പ് പരിശോധന നടത്തി. കൊടുവള്ളി, താമരശേരി, മുക്കം, ചേളന്നൂര്‍, ബാലുശേരി, കുന്ദമംഗലം ഭാഗങ്ങളിലാണ് പരിശോധന നടത്തിയത്. 34 സ്ഥാപനങ്ങളില്‍ ഭക്ഷ്യസുരക്ഷ ഉറപ്പാക്കുന്നതിനുള്ള പരിശോധന നടന്നു. പ്രധാനമായും ജ്യൂസ്, കുടിവെള്ള വില്‍പന സ്ഥപാനങ്ങളിലായിരുന്നു പരിശോധന. ഇതിന്റെ ഭാഗമായി ശേഖരിച്ച സാംപിളുകള്‍ കൂടുതല്‍ പരിശോധനയ്ക്കായി മലാപ്പറമ്പിലെ ലാബിലേക്ക് അയച്ചു.
ഒന്‍പത് സ്ഥാപനങ്ങള്‍ക്ക് സുരക്ഷാ നടപടികള്‍ സ്വീകരിക്കണമെന്നാവശ്യപ്പെട്ട് നോട്ടിസ് നല്‍കി. പരിശോധനയുടെ ഭാഗമായുള്ള റിപ്പോര്‍ട്ടിന്റെ അടിസ്ഥാനത്തിലായിരിക്കും ഭക്ഷ്യസുരക്ഷാ വകുപ്പ് തുടര്‍ നടപടി സ്വീകരിക്കുക. വരും ദിവസങ്ങളിലും കര്‍ശന പരിശോധയുണ്ടാകുമെന്ന് ഉദ്യോഗസ്ഥര്‍ അറിയിച്ചു. ജില്ലയിലെ 13 നിയോജക മണ്ഡലങ്ങളിലും പരിശോധന പുരോഗമിക്കുന്നുണ്ട്. ഓഫിസര്‍മാര്‍ ഇല്ലാത്ത മണ്ഡലങ്ങളില്‍ പകരം ഉദ്യോഗസ്ഥരെ ചുമതലപ്പെടുത്തിയാണ് പരിശോധന നടത്തുന്നത്.