കോഴിക്കോട്: വേനലിന് കടുപ്പമേറിയതോടെ ജില്ല വരള്‍ച്ചാ ഭീതിയില്‍. മഴ നീളുന്ന പക്ഷം ജില്ലയില്‍ കുടിവെള്ളക്ഷാമം അതിരൂക്ഷമാകും. മലയോര മേഖലയായ താമരശ്ശേരി, പേരാമ്പ്ര, വടകര, കുറ്റ്യാടി, മുക്കം എന്നീ പ്രദേശങ്ങളിലാണ് വരള്‍ച്ചാ ഭീഷണി കൂടുതലുള്ളത്. സര്‍ക്കാരിന്റെ നിയന്ത്രണത്തിലുള്ള കുടിവെള്ള പദ്ധതികള്‍ പലയിടങ്ങളിലും പൂര്‍ണമായി പ്രവര്‍ത്തന സജ്ജമല്ലാത്തത് ജനത്തെ വലയ്ക്കുന്നുണ്ട്. ചിലയിടങ്ങളില്‍ വിവിധ കാരണങ്ങള്‍ പറഞ്ഞ് പദ്ധതി പൂര്‍ത്തീകരിച്ചിട്ടുമില്ല.
വേനല്‍ കാലത്ത് ജില്ലയിലെ കുടിവെള്ള പദ്ധതികളെ നിയന്ത്രിക്കുന്ന പെരുവണ്ണാമുഴി ഡാമില്‍ ആരംഭിച്ച ജപ്പാന്‍ കുടിവെള്ള പദ്ധതി പൂര്‍ത്തീകരിച്ചു വരുന്നതേയൊള്ളൂ. അതേസമയം ഡാമിലെ ജലനിരപ്പ് കുറഞ്ഞത് ആശങ്കയ്ക്ക് ഇടയാക്കിയിട്ടുണ്ട്. കോഴിക്കോട് നഗരത്തില്‍ ഉള്‍പ്പെടെ ജപ്പാന്‍ കുടിവെള്ള പദ്ധതിയെ ആശ്രയിച്ചാണ് ജനം കഴിയുന്നത്.
ജനുവരി അവസാനത്തോടെ ജില്ലയിലെ കനാല്‍ നവീകരണം പൂര്‍ത്തീകരിച്ച് ജില്ലയ്ക്കകത്തും പുറത്തുമായി വെള്ളമെത്തിക്കാനായിരുന്നു അധികൃതരുടെ ശ്രമം. എന്നാല്‍ ഇതു പൂര്‍ത്തീകരിക്കാന്‍ കഴിഞ്ഞിട്ടില്ല. വെള്ളമില്ലാത്തതിനാല്‍ കൃഷി ഉപജീവനമാര്‍ഗമാക്കിയ മലയോര കര്‍ഷകരും ആശങ്കയിലാണ്. നെല്‍പാടങ്ങള്‍ വരണ്ടുണങ്ങിയതോടെ ഇടവിള കൃഷി ഇത്തവണ നടത്തിയിട്ടില്ല. വേനല്‍ മഴയിലാണ് കര്‍ഷകരുടെ ഏക പ്രതീക്ഷ.
സ്‌കൂളുകള്‍, ആശുപത്രികള്‍, കച്ചവട സ്ഥാപനങ്ങള്‍, ഹോട്ടലുകള്‍ എന്നിവയും വരള്‍ച്ച കാരണം അടച്ചിടേണ്ട സ്ഥിതിയാണുള്ളതെന്ന് ബന്ധപ്പെട്ടവര്‍ പറയുന്നു. കടുത്ത ജലക്ഷാമം മുന്നില്‍കണ്ട് പഞ്ചായത്തുകള്‍ നീര്‍ത്തട പദ്ധതികളുമായും കുടിവെള്ള സ്രോതസ്  സംരക്ഷണവുമായും രംഗത്തുണ്ട്. എന്നാല്‍ പ്രാദേശിക ഭരണകൂടങ്ങള്‍ മിക്കയിടത്തും കാര്യമായ കരുതല്‍ പ്രവര്‍ത്തനങ്ങളൊന്നും നടത്തിയിട്ടില്ലെന്ന് പരാതി വ്യാപകമാണ്. വേനല്‍ കനത്തതോടെ ജലജന്യരോഗങ്ങളും വര്‍ധിച്ചിട്ടുണ്ട്. പനിയും മറ്റു അസുഖങ്ങളുമായി നിരവധി പേരാണ് ദിവസവും ആശുപത്രികളിലെത്തുന്നത്.