കാസര്‍കോട്: വര്‍ഗീയ വിഷം തുപ്പുന്ന പ്രധാനമന്ത്രി നരേന്ദ്രമോദിയെയും ബിജെപി അധ്യക്ഷന്‍ അമിത്ഷായെയുമാണ് തെരഞ്ഞെടുപ്പ് കമീഷന്‍ വിലക്കേണ്ടതെന്ന് സിപി എം പൊളിറ്റ്ബ്യൂറോ അംഗം ബൃന്ദ കാരാട്ട്.

മായാവതിയെ അല്ല വിലക്കേണ്ടത്. ഒന്നാംഘട്ട തെരഞ്ഞെടുപ്പ് നടന്ന രാജ്യത്തെ 91 മണ്ഡലങ്ങളില്‍ ജനങ്ങള്‍ തിരിച്ചടിക്കുമെന്ന് ഉറപ്പായപ്പോള്‍ മോദിയും അമിത്ഷായും രാഷട്രീയമുതലെടുപ്പിന് വര്‍ഗീയ വിഷം തുപ്പുകയാണ്. ഇവര്‍. ഇവരെ വിലക്കാന്‍ കമ്മിഷനു ധൈര്യമില്ലേ എന്നും അവര്‍ ചോദിച്ചു. മോദി തമിഴ്‌നാട്ടില്‍ പോയി അവിടത്തെ ജീവിത പ്രശ്‌നങ്ങളല്ല കേരളത്തിലെ ശബരിമലയെ കുറിച്ചാണ് പറയുന്നത്. വര്‍ഗീയ വൈര്യമുണ്ടാക്കി ജനങ്ങളെ ഭിന്നിപ്പിച്ച് രാഷ്ട്രീയ മുതലെടുപ്പിനാണ് ബിജെപിയും ആര്‍എസ്എസും ശ്രമിക്കുന്നത്.

ഇന്ത്യയുടെ ഹൃദയം വീണ്ടെടുക്കാനുള്ള തെരഞ്ഞെടുപ്പാണിത്. കഴിഞ്ഞ അഞ്ചുവര്‍ഷത്തെ ഭരണത്തില്‍ ബിജെപി ഇന്ത്യയുടെ ഹൃദയം കവര്‍ന്നെടുത്തു. ലോകസഭയിലെ ഭൂരിപക്ഷം ഉപയോഗിച്ച് ഭരണഘടനെ തകര്‍ക്കാന്‍ ശ്രമിച്ചു. സ്വാതന്ത്ര്യാനന്തര ഇന്ത്യയില്‍ ഭരണഘടന ഏറ്റവുമധികം വെല്ലുവിളി നേരിട്ട ഭരണമാണ് മോദിയുടെത്. ജനാധിപത്യം തകര്‍ത്തു. മതപരവും ലിംഗപരവുമായ സമത്വം ബിജെപി അംഗീകരിക്കുന്നില്ല. പൗരാവകാശം ഇല്ലാതാക്കുന്നു. മറ്റ് രാജ്യങ്ങളില്‍ നിന്നുള്ള ഹിന്ദുകള്‍ക്ക് മാത്രം രാജ്യത്ത് പൗരത്വം നല്‍കൂവെന്നാണ് മോഡി ഭരണം പ്രഖ്യാപിക്കുന്നത്.

ഡോ. അംബേദ്ക്കറുടെ നേതൃത്വത്തിലുള്ള ഭരണഘടനയല്ല മനുസ്മൃതിയാണ് തങ്ങള്‍ അംഗീകരിക്കുന്നതെന്ന് വ്യക്തമാക്കിയവരാണ് ആര്‍എസ്എസ്. മതേതരത്വം ഇവര്‍ അംഗീകരിക്കുന്നില്ല. തൊഴിലില്ലായ്മയും കര്‍ഷക ആത്മഹത്യയും പെരുകുന്നു. ന്യൂനപക്ഷങ്ങളും ദളിതുകളും ആള്‍ക്കൂട്ട അക്രമത്തില്‍ കൊല്ലപ്പെടുന്നു. അമ്പലത്തിനെയും മതത്തെയും കുറിച്ച് മാത്രമാണ് ബിജെപി പറയുന്നത്. ബിജെപിയെ പരാജയപ്പെടുത്തി ഇന്ത്യയെ രക്ഷിക്കണം. അവര്‍ പറഞ്ഞു.

എല്‍ഡിഎഫ് സ്ഥാനാര്‍ഥി കെ പി സതീഷ്ചന്ദ്രന്റെ തെരഞ്ഞെടുപ്പ് പ്രചാരണത്തിന് കാസര്‍കോട് പാര്‍ലമെന്റ് മണ്ഡലത്തിലെ വിവിധ കേന്ദ്രങ്ങളില്‍ സംഘടിപ്പിച്ച റാലികള്‍ ഉദ്ഘാടനം ചെയ്യുകയായിരുന്നു അവര്‍.