തൃശൂര്‍: ശബരിമല വിശ്വാസസംരക്ഷണത്തിന് ഏതറ്റം വരെയും പോകുമെന്നും അയ്യപ്പവിശ്വാസികള്‍ക്കൊപ്പം ഉണ്ടാകുമെന്നും ബിജെപി അധ്യക്ഷന്‍ അമിത് ഷാ, ശബരിമലയുടെ വിശുദ്ധി തകര്‍ക്കാന്‍ കമ്മ്യൂണിസ്റ്റ് സര്‍ക്കാര്‍ ശ്രമിച്ചെന്നും തൃശ്ശൂരില്‍ എന്‍ഡിഎ സ്ഥാനാര്‍ഥി സുരേഷ് ഗോപിക്ക് വേണ്ടിയുള്ള പ്രചാരണ യോഗത്തില്‍ സംസാരിക്കുകയായിരുന്നു അദ്ദേഹം.

'കേരളത്തിലെ സര്‍ക്കാര്‍ സുപ്രീംകോടതി വിധിയുടെ മറ പിടിച്ച് ഭക്തര്‍ക്കെതിരെ അക്രമം അഴിച്ചുവിട്ടു. എത്രയോ സുപ്രീംകോടതി വിധികള്‍ ഇവിടെ നടപ്പാകാതെ കിടക്കുന്നു. ശബരിമല വിധി മാത്രം നടപ്പാക്കാന്‍ എന്താണ് ഇത്ര തിടുക്കം? എന്നും അമിത് ഷാ ചോദിച്ചു.

'ശബരിമല വിശ്വാസസംരക്ഷണത്തിനൊപ്പം അയ്യപ്പവിശ്വാസികള്‍ക്കൊപ്പം ബിജെപി ഉണ്ടാകും. ബിജെപി പ്രകടനപത്രികയില്‍ ശബരിമലയിലെ വിശ്വാസങ്ങള്‍ സംരക്ഷിക്കുമെന്നും അത് സുപ്രീംകോടതിയുടെ മുമ്പാകെ എത്തിക്കുമെന്നും പറഞ്ഞത് അതുകൊണ്ടാണ്. ശബരിമലയുടെ പരിശുദ്ധി നശിപ്പിക്കാന്‍ ശ്രമിച്ചാല്‍ ഏത് തരത്തിലുള്ള പ്രക്ഷോഭങ്ങളും ബിജെപി നടത്തും. അതിനായി ഏതറ്റം വരെയും പോകും', അമിത് ഷാ പറഞ്ഞു.

നരേന്ദ്രമോദി സര്‍ക്കാര്‍ ഭീകരവാദികളുമായി ചര്‍ച്ച ചെയ്യില്ല. അവിടെ നിന്ന് വെടിയുണ്ട വന്നാല്‍ ഇവിടെ നിന്ന് ബോംബ് വര്‍ഷിക്കുമെന്നും അമിത് ഷാ പറഞ്ഞു.