കൊല്ലം: സിവില്‍സര്‍വിസ് പരീക്ഷയില്‍ കൊല്ലം ജില്ലയ്ക്ക് അഗ്നിത്തിളക്കം. മുഖത്തല ആശിഷ് ഭവനില്‍ യേശുദാസ്-റോസമ്മ ദമ്പതികളുടെ മകനും പത്തനാപുരം ഫയര്‍ഫോഴ്‌സ് സ്‌റ്റേഷനിലെ ഫയര്‍ ഓഫിസറുമായ ആശിഷ് ദാസ്(33) 291-ാം റാങ്ക് നേടിയാണ് വിജയം കുറിച്ചത്.
അഞ്ചുവര്‍ഷത്തെ പരിശ്രമത്തിനിടെയാണ് ആശിഷിന് സിവില്‍ സര്‍വിസ് പരീക്ഷയെഴുതി മൂന്നക്ക റാങ്ക് നേടാനായത്.
ഫയര്‍മാന്‍ തസ്തികയില്‍ നിന്നു കൊണ്ടായിരുന്നു എജ്യൂക്കേഷന്‍ ലീവില്‍ പഠനം നടത്തിയത്. ഹോട്ടല്‍ മാനേജ്‌മെന്റില്‍ ബിരുദധാരിയായ ആശിഷ് സംസ്ഥാനത്തെ ബിരുദം അടിസ്ഥാന യോഗ്യതയായുള്ള പരീക്ഷകളില്‍ പങ്കെടുക്കാന്‍ കഴിയാത്ത അവസ്ഥയിലാണ് കേന്ദ്ര സര്‍വിസുകളുടെ പരീക്ഷകളിലേക്ക് തിരിഞ്ഞത്. കഴിഞ്ഞ സിവില്‍ സര്‍വിസ് പരീക്ഷയില്‍ അവസാന നിമിഷം അഭിമുഖത്തില്‍ പിന്നാക്കം പോയതിനാല്‍ ആദ്യവട്ടം സിവില്‍ സര്‍വിസ് മോഹം പൂവണിഞ്ഞില്ല. ഫയര്‍ഫോഴ്‌സിലേക്ക് നടന്ന പി.എസ്.സി പരീക്ഷയില്‍ ലഭിച്ച ഒന്നാം റാങ്കും സിവില്‍ സര്‍വിസിന് തയാറെടുക്കാന്‍ പ്രചോദനമായെന്ന് ആശിഷ് പറഞ്ഞു.
ഐ.എ.എസ് ലഭിക്കുമെന്നാണ് പ്രതീക്ഷ. എന്നാല്‍ ഐ.പി.എസാണെങ്കില്‍ ഇംപ്രൂവ് ചെയ്യാനാണ് ആശിഷിന്റെ തീരുമാനം.
ഗള്‍ഫില്‍ നഴ്‌സായി ജോലിചെയ്യുന്ന സൂര്യയാണ് ഭാര്യ. മകള്‍ അമേയക്ക് ഏഴുമാസമാണ് പ്രായം.