കാക്കനാട്: ഇതര സംസ്ഥാന ടൂറിസ്റ്റ് ബസുകളില്‍ അനധികൃതമായി ചരക്ക് കടത്തുന്നതായിട്ടുളള പരാതിയെ തുടര്‍ന്ന് മോട്ടോര്‍ വാഹന വകുപ്പ് നടത്തിയ പരിശോധനയില്‍ 42 ബസുകള്‍ പിടികൂടി. പാര്‍സല്‍ ബോക്‌സുകളിലായി അടക്കം ചെയ്ത പൂക്കള്‍, ഇലക്ട്രോണിക് സാധനങ്ങള്‍ തുണികള്‍ തുടങ്ങിയവയാണ് പിടിച്ചെടുത്തത്. വിഷുദിനത്തിലും ഇന്നലെയുമായി നടത്തിയ മിന്നല്‍ പരിശോധനയിലാണ് അനധികൃത ചരക്കുനീക്കം ശ്രദ്ധയില്‍പ്പെട്ടത്.
കേരളത്തില്‍ റോഡ് ടാക്‌സ് അടയ്ക്കാത്ത പോണ്ടിച്ചേരിയില്‍ രജിസ്റ്റര്‍ ചെയ്ത ഒരു വാഹനത്തില്‍ നിന്ന് മാത്രമായി 1,83,000 രൂപ നികുതി ഈടാക്കി. മറ്റു വാഹനങ്ങളില്‍ നിന്നും പിഴയിനത്തില്‍ 1,35,000 രൂപയും നികുതി അടക്കാത്ത ഒരു കാരവാനിന് 80,000 രൂപയും ഈടാക്കി.ന ികുതി അടയ്ക്കാത്ത ഒരു തമിഴനാട് ബസ് കസ്റ്റഡിയില്‍ എടുത്തു.
എറണാകുളം ആര്‍.ടി.ഒ ജോജി. പി. ജോസ്, എന്‍ഫോഴ്‌സ്‌മെന്റ് ആര്‍.ടി.ഒ കെ. മനോജ് കുമാര്‍ എന്നിവരുടെ നിര്‍ദേശത്തെത്തുടര്‍ന്ന് ജോയിന്റ് ആര്‍.ടി.ഒ ബിജു ജെയിംസിന്റെ നേതൃത്വത്തില്‍ നടന്ന പരിശോധനയില്‍ പതിനഞ്ചോളം മോട്ടോര്‍ വാഹന ഉദ്യോഗസ്ഥര്‍ പങ്കെടുത്തു.