കൊച്ചി:കൊച്ചിയുടെ വികസനത്തിന് 'ട്രോള്‍ മി ചലഞ്ചു'മായി എറണാകുളത്തെ എന്‍.ഡി.എ സ്ഥാനാര്‍ഥി അല്‍ഫോണ്‍സ് കണ്ണന്താനം. ട്രോളുകളിലൂടെ അത്ഭുതപ്പെടുത്തുന്ന സര്‍ഗ്ഗശേഷി പ്രതിഫലിപ്പിക്കുന്ന മലയാളികള്‍ അത് പോസിറ്റീവായി ഉപയോഗിക്കാന്‍ ലക്ഷ്യമിട്ടാണ് ചലഞ്ചെന്ന് കണ്ണന്താനം ഔദ്യോഗിക ഫേസ്ബുക്ക് പേജിലെ പോസ്റ്റില്‍ പറയുന്നു.
എത്ര ഗൗരവമുള്ള കാര്യവും തമാശയാക്കി മലയാളികള്‍ ആസ്വാദിക്കാറുണ്ട്. തന്നെ ട്രോളുന്ന വീരന്‍മാര്‍ കൊച്ചിയുടെ വികസനത്തെക്കുറിച്ച് നല്ല ട്രോളുകള്‍ ഉണ്ടാക്കി തന്റെ ഫേസ്ബുക്ക് പേജില്‍ കമന്റ് ചെയ്യാനാണ് കണ്ണന്താനത്തിന്റെ ചലഞ്ച്. കൊച്ചിക്കു വേണ്ടിയായതിനാല്‍ തന്നെയും ട്രോളില്‍ കഥാപാത്രമാക്കാമെന്നും തെരഞ്ഞെടുപ്പ് വേളയില്‍ സമ്മാനങ്ങള്‍ നല്‍കാനാകാത്തതിനാല്‍ മികച്ച ട്രോളര്‍മാര്‍ക്ക് തനിക്കൊപ്പം സെല്‍ഫിയെടുത്തു തന്റെ ഫേസ്ബുക്ക് പേജില്‍ ഇടാമെന്നും സ്ഥാനാര്‍ഥി പറയുന്നു.