കോണ്‍ഗ്രസില്‍ ചേര്‍ന്ന എം.എല്‍.എമാരെ വിലക്കുന്നതിന് ഇടക്കാല ഉത്തരവ് വേണമെന്ന ആവശ്യം തള്ളി; എം.എല്‍.എമാര്‍ക്ക് നോട്ടിസ്
ജയ്പൂര്‍: അശോക് ഗെലോട്ടിന്റെ നേതൃത്വത്തിലുള്ള രാജസ്ഥാനിലെ കോണ്‍ഗ്രസ് സര്‍ക്കാരിന് ആശ്വാസം. കോണ്‍ഗ്രസില്‍ ചേര്‍ന്ന എം.എല്‍.എമാരെ ആ പാര്‍ട്ടിയുടെ ഭാഗമായി തുടരുന്നതില്‍നിന്നു വിലക്കണമെന്നും സഭയില്‍ പ്രവേശിക്കുന്നതു തടഞ്ഞ് ഇടക്കാല ഉത്തരവ് നല്‍കണമെന്നുമാവശ്യപ്പെട്ട് ബി.എസ്.പി നല്‍കിയ ഹരജി ഹൈക്കോടതി തള്ളി. ഇതേ ആവശ്യമുന്നയിച്ച് നേരത്തെ സമര്‍പ്പിക്കപ്പെട്ടിരുന്ന ഹരജി സിംഗിള്‍ ബെഞ്ച് തള്ളിയിരുന്നു.
അതേസമയം, ഹരജിയില്‍ ആറു ബി.എസ്.പി എം.എല്‍.എമാര്‍ക്ക് നോട്ടിസയക്കാന്‍ കോടതി ഉത്തരവിടുകയും വാദം സിംഗിള്‍ ബെഞ്ചിനു വിടുകയും ചെയ്തിട്ടുണ്ട്. നേരത്തെ സമാന ഹരജിയില്‍ രാജസ്ഥാന്‍ സ്പീക്കര്‍ക്ക് നോട്ടിസയച്ചിരുന്ന സിംഗിള്‍ ബെഞ്ച്, ഓഗസ്റ്റ് 11നകം മറുപടി നല്‍കാന്‍ നിര്‍ദേശിക്കുകയും ചെയ്തിരുന്നു. ഇതേ ബെഞ്ചുതന്നെയാണ് പുതിയ ഹരജികളും പരിഗണിക്കുക.
ഹരജി ഓഗസ്റ്റ് 11നു വീണ്ടും പരിഗണിക്കും. 14ന് നിയമസഭ ചേരാനിരിക്കേ, ഈ വിഷയത്തില്‍ 11നു കോടതി വിധി പുറപ്പെടുവിച്ചാല്‍ അതു സര്‍ക്കാരിന് നിര്‍ണായകമാകും. കോണ്‍ഗ്രസില്‍ ചേര്‍ന്ന എം.എല്‍.എമാര്‍ക്ക് അനുകൂലമായാണ് വിധിയെങ്കില്‍ സര്‍ക്കാരിന് അതു വലിയ ആശ്വാസമാകും. 1
02 എം.എല്‍.എമാരുടെ പിന്തുണയുണ്ടെന്ന ഗെലോട്ടിന്റെ വാദത്തിനു ബലവുമാകും. എന്നാല്‍, ബി.എസ്.പിയുടെ ഹരജി കോടതി അംഗീകരിച്ചാല്‍ സര്‍ക്കാരിന്റെ ഭൂരിപക്ഷം വീണ്ടും കുറയും. ഇതു 14ന് നടക്കുന്ന നിയമസഭാ സമ്മേളനത്തെ കൂടി അതിനിര്‍ണായക സാഹചര്യത്തിലേക്കു കൊണ്ടുപോകും.