കാസര്‍കോട്: മോഷ്ടാവെന്നു ആരോപിച്ചു പൊലിസില്‍ ഏല്‍പ്പിച്ച ഇതര സംസ്ഥാന യുവാവിനെ നാട്ടിലേക്കു അയക്കുമെന്ന് പൊലിസ്. ബംഗാള്‍ സ്വദേശിയായ യുവാവിനെയാണ് നാട്ടുകാര്‍ മോഷ്ടാവെന്നാരോപിച്ച് പൊലിസില്‍ ഏല്‍പ്പിച്ചത്.
ഇന്നലെ പുലര്‍ച്ചെ നാലോടെ തളങ്കര സിറാമിക് റോഡിലെ ഒരു വീടിന്റെ വാതിലില്‍ ഇയാള്‍ മുട്ടിയതോടെ പ്രദേശവാസികള്‍ പൊലിസില്‍ വിവരം അറിയിച്ചിരുന്നു. ഇതേ തുടര്‍ന്ന് പൊലിസ് സ്ഥലത്തെത്തിയെങ്കിലും അപ്പോഴേക്കും യുവാവ് രക്ഷപ്പെട്ടിരുന്നു. എന്നാല്‍ ഇയാളുടെ പിന്നാലെ ഓടിയ നാട്ടുകാര്‍ യുവാവിനെ പിടികൂടി പൊലിസില്‍ ഏല്‍പ്പിച്ചു. ബംഗാള്‍ സ്വദേശിക്കു മാനസികാസ്വാസ്ഥ്യം കണ്ടതിനെ തുടര്‍ന്ന് ഇയാളെ പൊലിസ് വിട്ടയച്ചു.
പിന്നീട് ഇയാള്‍ തായലങ്ങാടിയിലെ മറ്റൊരു വീട്ടില്‍ കയറി വീടിനകത്തുണ്ടായിരുന്ന സ്ത്രീയുടെ കഴുത്തിനു തോര്‍ത്തു മുറുക്കി അപകടപ്പെടുത്താന്‍ ശ്രമിച്ചതോടെ ബഹളം കേട്ടെത്തിയ നാട്ടുകാര്‍ ഇയാളെ മോഷ്ടാവെന്നു ആരോപിച്ചു കൈയേറ്റം ചെയ്യാന്‍ ശ്രമിച്ചതായും പൊലിസ് പറഞ്ഞു. മനോരോഗിയായ ഇയാളെ സ്വദേശത്തേക്കു തിരിച്ചയക്കാനുള്ള ശ്രമത്തിലാണ് പൊലിസ്.

.