കുന്നംകുളം:  വിമുക്തഭടന്‍മാര്‍ക്കുവേണ്ടിയുള്ള കേന്ദ്രപ്രതിരോധ മന്ത്രാലയത്തിന്റെ ഇ.സി.എച്ച്.എസ് ആശുപത്രി കുന്നംകുളത്ത് സ്ഥാപിക്കാന്‍ ആലോചന.
 സീനിയര്‍ ഗ്രൗണ്ടിനു സമീപത്തെ 34 സെന്റ് വരുന്ന റവന്യൂഭൂമിയിലാണ് ആശുപത്രി നിര്‍മിക്കാന്‍ ഒരുങ്ങുന്നത്. വിവധ സേനകളില്‍ നിന്നും വിരമിച്ചവരുടെ ചികിത്സക്കുവേണ്ടിയുള്ള പോളിക്ലിനിക്കില്‍ ആധുനിക സൗകര്യവും, സ്‌പെഷലിസ്റ്റ് ഡോക്ടര്‍മാരുടെ സേവനവുമുണ്ടാകും.
പദ്ധതിക്കായുള്ള സ്ഥലം കണ്ടെത്തി ശുപാര്‍ശ ചെയ്യുകയെന്ന പ്രാഥമിക നടപടിയാണ് ജില്ലാ ഭരണകൂടത്തിന്റെ ഉത്തരവാദിത്വം. കലക്ടറുടെ നേതൃത്വത്തിലുള്ള സംഘം ഇതിനായി സ്ഥലം സന്ദര്‍ശിക്കുകയും നഗരസഭ അധികൃതരുമായി ആലോചന നടത്തുകയും ചെയ്തു.
വിഷയത്തില്‍ ജില്ലാ ഭരണകൂടത്തിന്റെ നിര്‍ദ്ദേശം നഗരസഭക്ക് കൈമാറി. ഇത് കൗണ്‍സില്‍ യോഗത്തില്‍ ചര്‍ച്ച ചെയ്ത് നടപടി പൂര്‍ത്തീകരിക്കുന്നതിന് ശേഷമാണ് പദ്ധതിക്കായുള്ള ശുപാര്‍ശ നല്‍കുക.