തൃശൂര്‍: ഗവ. ഹയര്‍ സെക്കന്‍ഡറി സ്‌കൂളുകളോടും പി.എസ്.സി ഉദ്യോഗാര്‍ഥികളോടുമുള്ള സര്‍ക്കാരിന്റെയും വിദ്യാഭ്യാസ വകുപ്പിന്റെയും നിഷേധാത്മക നിലപാടിനെതിരേ എച്ച്.എസ്.എസ് അധ്യാപക ഉദ്യോഗാര്‍ഥികള്‍ വിദ്യാഭ്യാസ മന്ത്രിയുടെ വീട്ടുപടിക്കലേക്ക് കുടുംബസമേതം പിച്ചച്ചട്ടിയുമായി മാര്‍ച്ച് നടത്തി.
 2014-15, 15-16 അധ്യയന വര്‍ഷം ആരംഭിച്ച ഗവ. ഹയര്‍ സെക്കന്‍ഡറികളില്‍ തസ്തിക നിര്‍ണയം നടത്തി നിലവിലെ റാങ്ക് ലിസ്റ്റില്‍ നിന്ന് നിയമനം നടത്തുക, ജൂണ്‍ 30ന് അവസാനിക്കുന്ന എല്ലാ ഹയര്‍ സെക്കന്‍ഡറി അധ്യാപക റാങ്ക് ലിസ്റ്റുകളും ഉപാധികളില്ലാതെ ആറ് മാസത്തേക്ക് നീട്ടി നല്‍കുക, മേഖലയില്‍ നിലനില്‍ക്കുന്ന അപ്രഖ്യാപിത നിയമന നിരോധനം അവസാനിപ്പിക്കുക തുടങ്ങിയ ആവശ്യങ്ങളുന്നയിച്ചായിരുന്നു മാര്‍ച്ച്.
2014ല്‍ അനുവദിച്ച എച്ച് എസ് സ്‌കൂളുകളില്‍ അധ്യാപക തസ്തിക നിര്‍ണയ ഉത്തരവ് അകാരണമായി വൈകിപ്പിക്കുന്നതിനാല്‍ പി.എസ്.സി വഴിയുള്ള സ്ഥിര നിയമനം നിലച്ച അവസ്ഥയാണെന്ന് നേതാക്കള്‍ ആരോപിച്ചു.
 എല്ലാ വിഷയങ്ങളുടെയും റാങ്ക് ലിസ്റ്റിന്റെ കാലാവധി ജൂണ്‍ 30ന് അവസാനിക്കുകയാണ്. ഭൂരിഭാഗം ലിസ്റ്റുകളിലും 40 ശതമാനത്തില്‍ താഴെ മാത്രമാണ് നിയമനം നടന്നിട്ടുള്ളത്. ഉയര്‍ന്ന യോഗ്യത നേടിയ ഉദ്യോഗാര്‍ഥികളായതിനാല്‍ ഭൂരിഭാഗം പേര്‍ക്കും ഇനിയൊരു പി.എസ്.സി പരീക്ഷ എഴുതാന്‍ പ്രായം അനുവദിക്കുന്നില്ല. സമരത്തിന്റെ തുടര്‍ച്ചയായി മെയ് ഒന്ന് മുതല്‍ സെക്രട്ടേറിയറ്റ് പടിക്കല്‍ മരണം വരെ നിരാഹാരം ആരംഭിക്കുമെന്ന് നേതാക്കള്‍ വ്യക്തമാക്കി. രവീന്ദ്രന്‍ ഉദ്ഘാടനം ചെയ്തു.