മീനങ്ങാടി: ചെറിയ മഴ പെയ്താല്‍ പോലും വെള്ളം കെട്ടിനിന്ന് ചളിക്കളമാകുന്ന മീനങ്ങാടി ടൗണിലെ സ്റ്റേഡിയത്തിലേക്കിറങ്ങുന്ന റോഡിനോടുള്ള അധികൃതരുടെ അവഗണന തുടരുന്നു. നൂറുകണക്കിന് വിദ്യാര്‍ഥികളും പ്രദേശവാസികളും ഏറെ ആശ്രയിക്കുന്ന റോഡ് ഗതാഗതത്തിന് അനുയോജ്യമാക്കണമെന്ന വര്‍ഷങ്ങളായുള്ള ആവശ്യമാണ് അധികൃതര്‍ അവഗണിക്കുന്നത്.
ടൗണില്‍ നിന്നും സ്റ്റേഡിയം റോഡ്, സ്‌കൂള്‍, ഹോസ്പിറ്റല്‍ റോഡുകള്‍ എന്നിവിടങ്ങളിലേക്കെത്താനുള്ള എളുപ്പമാര്‍ഗമാണ് ചളിക്കളമായി കിടക്കുന്ന ഈ പാത. ടൗണിലെ ഗതാഗത കുരുക്കിനും പരിഹാരമാണ് ഈറോഡ്. ദേശീയ പാതയില്‍ നിന്ന് സ്റ്റേഡിയം റോഡിലേക്ക് നൂറ് മീറ്റര്‍മാത്രം അകലമുള്ള ഈ റോഡില്‍ പകുതിയോളം ദൂരം കോണ്‍ക്രീറ്റ് ചെയ്തിട്ടുണ്ട്. ബാക്കി വരുന്ന ഭാഗങ്ങളില്‍ ചളിയും വെള്ളവും കെട്ടിക്കിടന്ന് കാല്‍നടയാത്ര പോലും ദുഷ്‌കരമായ അവസ്ഥയാണ് നിലവില്‍. കായിക മേളകളും വിവിധ ടൂര്‍ണമെന്റുകളും വിജ്ഞാന  സദസുകള്‍ക്കും വേദിയാകുന്ന മീനങ്ങാടി ഗ്രാമ പഞ്ചായത്ത് സ്റ്റേഡിയത്തിലേക്കുള്ള പ്രധാന റോഡുകളിലൊന്നാണിത്. കാല്‍നട യാത്രക്കും വാഹന ഗതാഗതത്തിനും റോഡ് അനുയോജ്യമാക്കണമെന്ന ആവശ്യമുയരാന്‍ തുടങ്ങിയിട്ട് വര്‍ഷങ്ങളായെങ്കിലും ബന്ധപ്പെട്ടവരുടെ ഭാഗത്ത് നിന്നും ഒരു നടപടിയുമുണ്ടാവുന്നില്ലെന്ന് നാട്ടുകാരും ആരോപിക്കുന്നു.