പാറശാല: തമിഴ്‌നാട്ടില്‍ നിന്ന് കേരളത്തിലേക്ക് ട്രെയിനില്‍ കടത്തിയ നാല് കിലോ കഞ്ചാവുമായി ഒരാള്‍ പാറശാല റെയില്‍വേ പൊലിസിന്റെ പിടിയിലായി. ഇടുക്കി ഉടമ്പഞ്ചോല അയ്യപ്പന്‍ കോവില്‍ വില്ലേജില്‍ മേപ്പാറ കയ്യാലക്കല്‍ വീട്ടില്‍ നിന്ന് എറണാകുളം തൃപ്പൂണിത്തുറ മേക്കരയിലെ സോമന്‍ എന്ന ആളുടെ വീട്ടില്‍ വാടകക്ക് താമസിക്കുന്ന പ്രിന്‍സ് (32) ആണ് പിടിയിലായത്. ഇന്നലെ രാവിലെ പാറശാല സ്റ്റേഷനില്‍ എത്തിയ മധുര പുനലൂര്‍ പാസഞ്ചര്‍ ട്രയിലെ യാത്രക്കാരനായിരുന്നു ഇയാള്‍. റെയില്‍വേ പൊലിസിന്റെ പതിവ് പരിശാധനക്കിടെയാണ് ബാഗിലാക്കി സീറ്റിനടിയില്‍ ഒളിപ്പിച്ചു കടത്തി കൊണ്ടുവന്ന കഞ്ചാവ് പിടിച്ചെടുത്തത്. അടിപിടി, മോഷണം ഇള്‍പ്പെടെ നിരവധി കേസുകളിലെ പ്രതിയാണ് പിടിയിലായ പ്രിന്‍സ് എന്ന് റെയില്‍വേ പൊലിസ് പറഞ്ഞു. നെയ്യാറ്റിന്‍കര കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.