പള്ളിക്കല്‍: വീട്ടുപറമ്പിലെ വൈക്കോല്‍ ആലയ്ക്ക് തീപിടിച്ചു. പരിസര വാസികള്‍ ഉടന്‍ തീയണക്കാന്‍ ശ്രമം നടത്തിയതിനാല്‍ ദുരന്തം എഴിവായി. നീരോല്‍പാലത്ത് മേത്തടിയില്‍ പനിച്ചി കോഴിത്തൊടി ഹംസ ഹാജിയുടെ വീട്ടു പറമ്പിലെ വൈക്കാല്‍ ആലക്കാണ് തീപിടിച്ചത്.
പത്തടിയോളം ഉയരത്തിലുള്ള ആലയിലെ വൈക്കോല്‍ പൂര്‍ണമായും കത്തി നശിച്ചു. എഴുപത്തി അയ്യായിരം രൂപയുടെ നഷ്ടം സംഭവിച്ചതായി നാട്ടുകാര്‍ പറഞ്ഞു. ഇന്നലെ ഉച്ചക്ക് ശേഷം മൂന്ന് മണിയോടെയാണ് സംഭവം. തീ കത്തുന്നത് ശ്രദ്ധയില്‍ പെട്ടയുടനെ ഓടിയെത്തിയ പരിസരവാസികള്‍ തീ അണക്കാന്‍ തുടങ്ങിയതിനാലാണ് തൊട്ടടുത്ത ഷെഡിലേക്കും വീടുകളിലേക്കും തീ പടരാതെ ദുരന്തം ഒഴിവായത്.
കാറ്റിനനുസരിച്ച് ആളിക്കത്തി കൊണ്ടിരുന്ന തീ മോട്ടോര്‍ ഉപയോഗിച്ചും വീടുകളില്‍ സൂക്ഷിച്ചിരുന്ന വെള്ളം കോരിയൊഴിച്ചും കെടുത്താന്‍ ശ്രമിച്ചു കൊണ്ടിരിക്കുകയായിരുന്നു നാട്ടുകാര്‍. മീഞ്ചന്തയില്‍ നിന്നും രണ്ട് യൂനിറ്റ് അഗ്നിശമന സേനയെത്തി ഒരു മണിക്കൂറിലേറെ പ്രയത്‌നിച്ച ശേഷമാണ് തീ പൂര്‍ണമായും അണയ്ക്കാനായത്.