തിരുവനന്തപുരം: സംസ്ഥാനത്ത് മത്സ്യബന്ധനം പുനരാരംഭിച്ചു. ട്രോളിങ് നിരോധനം കഴിഞ്ഞ് കൊവിഡ് നിയന്ത്രണങ്ങളും പ്രതികൂല കാലാവസ്ഥയും വന്നതിനാലാണ് മത്സ്യബന്ധനം പുനരാരംഭിക്കല്‍ വൈകിയത്.
ട്രോളിങ് നിരോധനം കഴിഞ്ഞ 31ന് അവസാനിച്ചിരുന്നു. ഇന്നലെയോടെ മത്സ്യത്തൊഴിലാളികള്‍ക്കുള്ള കാലാവസ്ഥാ മുന്നറിയിപ്പുകളും പിന്‍വലിച്ചു.
കൊവിഡ് വ്യാപന സാഹചര്യത്തില്‍ കൃത്യമായ നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്. ഒറ്റയക്ക നമ്പറില്‍ അവസാനിക്കുന്ന വള്ളങ്ങള്‍ക്കും ബോട്ടുകള്‍ക്കും തിങ്കള്‍, ബുധന്‍, വെള്ളി ദിവസങ്ങളിലും ഇരട്ടയക്കങ്ങള്‍ക്ക് ചൊവ്വ, വ്യാഴം, ശനി ദിവസങ്ങളിലുമാണ് മത്സ്യബന്ധനത്തിന് അനുമതി. ഞായറാഴ്ച അവധിയായിരിക്കും.
വള്ളങ്ങള്‍ 24 മണിക്കൂറിനുള്ളില്‍ പുറപ്പെട്ട സ്ഥലത്ത് തിരികെയെത്തണം. ഹാര്‍ബറുകളിലെ മത്സ്യലേലത്തിന് വിലക്കുണ്ട്. കണ്ടെയ്‌മെന്റ് സോണുകളില്‍നിന്നു പിടിച്ചുകൊണ്ടുവരുന്ന മത്സ്യം ആ മേഖലയ്ക്കുള്ളില്‍ മാത്രമേ വില്‍ക്കാന്‍ പാടുള്ളൂ. ബീച്ചില്‍ തുറക്കുന്ന കൗണ്ടറില്‍ രജിസ്റ്റര്‍ ചെയ്യുന്ന വാഹനങ്ങള്‍ക്കായിരിക്കും ഹാര്‍ബറിലേക്ക് പ്രവേശിക്കാന്‍ അനുമതി.
മത്സ്യത്തൊഴിലാളികള്‍ക്കായുള്ള പ്രത്യേക മാര്‍ഗ നിര്‍ദേശങ്ങള്‍ തയാറാക്കാന്‍ ജില്ലാ പൊലിസ് മേധാവികള്‍ക്ക് ഡി.ജി.പി നിര്‍ദേശം നല്‍കി.
തീരദേശ മേഖലയിലെ കൊവിഡ് പ്രതിരോധ പ്രവര്‍ത്തനങ്ങള്‍ ഏകോപിപ്പിച്ച് ക്രമസമാധാനവിഭാഗം എഡി.ജി.പിക്ക് റിപ്പോര്‍ട്ട് ചെയ്യാനായി ക്രൈംബ്രാഞ്ച് തിരുവനന്തപുരം റെയ്ഞ്ച് ഐ.ജിയെ ചുമതലപ്പെടുത്തി.