തളിപ്പറമ്പ്: വാഹനപരിശോധനക്കിടെ അമിതവേഗതയിലെത്തിയ ബൈക്കിടിച്ച് ഹോം ഗാര്‍ഡിന് പരുക്കേറ്റു. പരിയാരം പൊലിസ് സ്‌റ്റേഷനിലെ ഹോം ഗാര്‍ഡ് കാങ്കോല്‍ കുണ്ടയംകൊവ്വലിലെ തൈവളപ്പില്‍ ടി.വി രാജീവനെ(52)യാണ് ബൈക്കിടിച്ച് വലതുകൈ പൊട്ടിയനിലയില്‍ കണ്ണൂര്‍ ഗവ. മെഡിക്കല്‍ കോളജില്‍ പ്രവേശിപ്പിച്ചത്. ഇന്നലെ പുലര്‍ച്ചെ 12.10 ന് കൈതപ്രത്തായിരുന്നു സംഭവം.
പരിയാരം പൊലിസ് നൈറ്റ്പട്രോള്‍ നടത്തുന്നതിനിടയില്‍ കൈതപ്രത്ത് വച്ച് വാഹനങ്ങള്‍ പരിശോധിക്കവെയാണ് അമിതവേഗതയിലെത്തിയ പള്‍സര്‍ ബൈക്ക് രാജീവനെ ഇടിച്ചുതെറിപ്പിച്ചത്. എ.എസ്.ഐ ശശിധരന്‍ കൈകാണിച്ചെങ്കിലും നിര്‍ത്താതെ മുന്നോട്ട്‌പോയ ബൈക്കാണ് തൊട്ടടുത്തുനിന്ന രാജീവനെ ഇടിച്ചത്. പൊലിസുകാര്‍ പരുക്കേറ്റ രാജീവനെ ഉടന്‍ മെഡിക്കല്‍ കോളജില്‍ എത്തിക്കുകയായിരുന്നു. ബൈക്കും അതോടിച്ചയാളുടെയും ദൃശ്യം മാതമംഗലത്തെ ഒരു കടയിലെ സി.സി.ടി.വി കാമറയില്‍ പതിഞ്ഞിരുന്നു. ഇത് പരിശോധിച്ചതില്‍ നിന്നും ബൈക്ക് ഓടിച്ചയാളെ തിരിച്ചറിഞ്ഞതായും ഇയാളെ അറസ്റ്റു ചെയ്യുന്നതിനുളള നടപടികള്‍ ആരംഭിച്ചതായും പൊലിസ് പറഞ്ഞു.