വലന്‍സിയ - വിയ്യാറയല്‍

വിയ്യാറയലിനെതിരേ ഏകപക്ഷീയമായ വിജയത്തിലൂടെയാണ് വലന്‍സിയ യൂറോപ്പ ലീഗ് സെമിയിലെത്തിയത്. ആദ്യപാദത്തില്‍ 3-1ന് വിയ്യാറയലിനെ തകര്‍ത്ത വലന്‍സിയ രണ്ടാംപാദത്തില്‍ 2-0ത്തിന് വിജയിച്ച് അനായാസം സെമിയില്‍ പ്രവേശിച്ചു.
മികച്ച പ്രകടനം പുറത്തെടുത്തിട്ടും ഗോള്‍ നേടാന്‍ കഴിയാതെ പോയത് വിയ്യാറയലിന് തിരിച്ചടിയായി.

ആഴ്‌സനല്‍ - നാപോളി

സ്വന്തം മൈതാനത്ത് നടന്ന ആദ്യപാദ മത്സരത്തില്‍ 2-0ത്തിന് നാപോളിയെ തകര്‍ത്ത ആഴ്‌സനല്‍ രണ്ടാം പാദത്തില്‍ നാപോളിയെ 1-0ത്തിന് പരാജയപ്പെടുത്തി സെമിയിലെത്തി.
ഇരുപാദങ്ങളിലുമായി 3-0ത്തിനാണ് ആഴ്‌സനലിന്റെ വിജയം. രണ്ടാം പാദ ക്വാര്‍ട്ടര്‍ ഫൈനലില്‍ 36ാം മിനുട്ടില്‍ അലക്‌സാണ്ട്രേ ലാകസെറ്റെ നേടിയ ഗോളിലാണ് ആഴ്‌സനല്‍ വിജയിച്ചത്. സെമിയില്‍ വലന്‍സിയ ആണ് ആഴ്‌സനലിന്റെ എതിരാളി. മത്സരത്തില്‍ 70 ശതമാനം പന്ത് കൈവശംവച്ച് കളിച്ചത് നാപോളിയാണെങ്കിലും ഫിനിഷിങ്ങില്‍ പരാജയപ്പെട്ടതോടെ വിജയം അകന്നുനിന്നു.

ചെല്‍സി - സ്ലാവിയ പ്രാഗ

സ്ലാവിയയുടെ മൈതാനത്ത് നടന്ന ആദ്യപാദ ക്വാര്‍ട്ടര്‍ മത്സരത്തില്‍ എതിരില്ലാത്ത ഒരു ഗോളിന് വിജയിച്ച ചെല്‍സി അനായാസം കളി വരുതിയിലാക്കാമെന്ന ആത്മവിശ്വാസത്തിലാണ് സ്വന്തംമൈതാനത്ത് കളി തുടങ്ങിയത്. തുടക്കം മുതല്‍ ആക്രമിച്ചു കളിച്ച ചെല്‍സി അഞ്ചാം മിനുട്ടില്‍ പെഡ്രോയിലൂടെ ലീഡ് നേടുകയും ചെയ്തു. ജിറൂദും പെഡ്രോയും നടത്തിയ മിന്നല്‍ നീക്കത്തിനൊടുവില്‍ മനോഹരമായ ചിപ്പിങ് ഗോളിലൂടെയാണ് പെഡ്രോ സ്ലാവിയയുടെ വലചലിപ്പിച്ചത്. ഒന്‍പതാം മിനുട്ടില്‍ സ്ലാവിയ പ്രതിരോധ താരം സിമോണ്‍ ഡെലിയുടെ സെല്‍ഫ്‌ഗോളില്‍ ചെല്‍സി ഗോള്‍ ലീഡ് ഇരട്ടിപ്പിച്ചു. പെഡ്രോയുടെ ഗോള്‍ശ്രമം പോസ്റ്റില്‍ തട്ടിയതിന് ശേഷം ഡെലിയുടെ തലയിലിടിച്ച് പോസ്റ്റില്‍ കയറുകയായിരുന്നു. 17ാം മിനുട്ടില്‍ ജിറൂദിലൂടെ ചെല്‍സി ഗോള്‍ ലീഡ് മൂന്നാക്കി ഉയര്‍ത്തി. ഈ ഗോളിന് വഴിയൊരുക്കിയത് പെഡ്രോയായിരുന്നു. പക്ഷേ 25ാം മിനുട്ടില്‍ തോമസ് സൗസെക്കിന്റെ ഒരു മനോഹര ഹെഡ്ഡര്‍ ഗോളിലൂടെ സ്ലാവിയ തിരിച്ചടിച്ചു. ഗോള്‍നേടി രണ്ടും മിനുട്ട് തീരുന്നതിന് മുന്‍പേ പെഡ്രോ വീണ്ടും ചെല്‍സിക്ക് വേണ്ടി ഗോള്‍നേടി. പൊഡ്രോയുടെ മത്സരത്തിലെ രണ്ടാം ഗോളായിരുന്നിത്. രണ്ട് ഗോളുകള്‍ നേടിയും രണ്ട് ഗോളുകള്‍ക്ക് വഴിയൊരുക്കിയും ചെല്‍സിയെ സെമിയിലെത്തിച്ചത് പെഡ്രോയാണ്. ആദ്യ പകുതുയില്‍ നാല് ഗോളുകള്‍ നേടി കളംവിട്ട ചെല്‍സിയെ രണ്ടാം പകുതിയില്‍ സ്ലാവിയ ഞെട്ടിച്ചു. 51,54 മിനുട്ടുകളില്‍ പീറ്റര്‍ സെവ്‌സിക്കിലൂടെ തിരിച്ചടിച്ച സ്ലാവിയ ചെല്‍സിക്ക് ഭീഷണിയുയര്‍ത്തിയെങ്കിലും പ്രതിരോധം ശക്തിപ്പെടുത്തി ചെല്‍സി വിജയത്തിലെത്തി. ഇരുപാദങ്ങളിലുമായി 5-3നാണ് ചെല്‍സിയുടെ വിജയം.

ഫ്രാങ്ക്ഫര്‍ട്ട് - ബെനഫിക്ക

എവെ മത്സരത്തിലെ തോല്‍വിക്ക് സ്വന്തം മൈതാനത്ത്പകരം വീട്ടിയാണ് ഫ്രാങ്ക്ഫര്‍ട്ട് യൂറോപ്പ ലീഗ് സെമിയിലെത്തിയത്. ബെനഫിക്കയുടെ മൈതാനത്ത് നടന്ന ആദ്യ പാദത്തില്‍ ബെനഫിക്കയോട് 4-2ന് പരാജയപ്പെട്ട ഫ്രാങ്ക്ഫര്‍ട്ട് സ്വന്തം മൈതാനത്ത് നടന്ന രണ്ടാംപാദത്തില്‍ 2-0ത്തിന് ബെനഫിക്കയെ തകര്‍ത്ത് സെമിയിലെത്തി. ഇരുപാദങ്ങളിലുമായി 4-4 സമനിലയായെങ്കിലും എവെ ഗോള്‍ ബലത്തില്‍ ഫ്രാങ്ക്ഫര്‍ട്ട് സെമിയല്‍ പ്രവേശിക്കുകയായിരുന്നു. 36ാം മിനുട്ടില്‍ ഫിലിപ്പ് കോസ്റ്റികും 67ാം മിനുട്ടില്‍ സെബാസ്റ്റ്യന്‍ റോഡും ഫ്രാങ്ക്ഫര്‍ട്ടിന് വേണ്ടി ഗോള്‍ നേടി.