കൊച്ചി: കേരളത്തില്‍ ലോക്‌സഭാ തെരഞ്ഞെടുപ്പ് പ്രചാരണം അവസാനിക്കാന്‍ മണിക്കൂറുകള്‍ ശേഷിക്കേ ജനങ്ങളുടെ പ്രധാന പ്രശ്‌നങ്ങളില്‍ നിന്ന് ഒളിച്ചോടി കേന്ദ്ര-സംസ്ഥാന ഭരണ മുന്നണികള്‍. ലോക്‌സഭാ തെരഞ്ഞെടുപ്പുകള്‍ സംസ്ഥാന ഭരണത്തിന്റെ കൂടി വിലയിരുത്തലാകാറാണ് പതിവ്. ഭരിക്കുന്ന മുന്നണിയുടെ മുതിര്‍ന്ന നേതാക്കള്‍ ഇക്കാര്യം സമ്മതിക്കാറുമുണ്ട്. എന്നാല്‍, ഇക്കുറി ആരും ആ വാദം ഉന്നയിക്കുന്നില്ല.
കേരളം സമീപകാല ചരിത്രത്തിലെ ഏറ്റവും വലിയ പ്രതിസന്ധിയിലൂടെയാണ് കടന്നുപോകുന്നത്. എന്നിട്ടും സജീവ പ്രശ്‌നങ്ങള്‍ പ്രചാരണ വിഷയമാകുന്നില്ല. ശബരിമല വിവാദത്തിന്റെ മറവില്‍ ജനകീയ പ്രശ്‌നങ്ങള്‍ മൂടിവയ്ക്കുകയാണ്.

പ്രളയാനന്തര പുനര്‍നിര്‍മാണമാണ് പ്രധാന പ്രശ്‌നങ്ങളില്‍ മുഖ്യം. കഴിഞ്ഞ ഓഗസ്റ്റ് 15, 16 തിയതികളിലുണ്ടായ മഹാപ്രളയത്തില്‍ സംസ്ഥാനത്ത് ലക്ഷക്കണക്കിനുപേരാണ് ദുരിതമനുഭവിച്ചത്. 17,000 വീടുകള്‍ പൂര്‍ണമായും രണ്ടുലക്ഷത്തിലധികം വീടുകള്‍ ഭാഗികമായും തകര്‍ന്നു. ലക്ഷക്കണക്കിനുപേര്‍ ദുരിതാശ്വാസ ക്യാംപിലുമായി.
തകര്‍ന്ന വീടുകളുടെ പുനര്‍നിര്‍മാണത്തിന് ആയിരംകോടി അനുവദിക്കാന്‍ ഒക്ടോബറില്‍ ചേര്‍ന്ന മന്ത്രിസഭായോഗം തീരുമാനിച്ചു. ഭാഗികമായി തകര്‍ന്ന വീടുകളുടെ അറ്റകുറ്റപ്പണിക്ക് പതിനായിരം മുതല്‍ രണ്ടുലക്ഷം രൂപവരെയും പൂര്‍ണമായി തകര്‍ന്ന വീടുകളുടെ പുനര്‍നിര്‍മാണത്തിന് നാലുലക്ഷം രൂപയുമാണ് സര്‍ക്കാര്‍ വാഗ്ദാനം ചെയ്തത്. ആദ്യം ഡിസംബറിനകവും പിന്നെ മാര്‍ച്ച് 31നകവും പുനര്‍ നിര്‍മാണം പൂര്‍ത്തിയാക്കുമെന്നും പറഞ്ഞ അധികൃതര്‍ ഇപ്പോഴത് ജൂണ്‍ 30നകം എന്നാക്കിമാറ്റി. മാത്രമല്ല, ഗുണഭോക്താക്കളെ തെരഞ്ഞെടുത്തതിലും വ്യാപക പരാതികള്‍ ഉയര്‍ന്നു. അര്‍ഹര്‍ അവഗണിക്കപ്പെട്ടതിനൊപ്പം രാഷ്ട്രീയ സ്വാധീനം വഴി അനര്‍ഹര്‍ ഗുണഭോക്തൃ പട്ടികയില്‍ കടന്നുകൂടി ദുരിതാശ്വാസ തുക കൈപ്പറ്റി. റോഡും പാലവും അടക്കമുള്ള അടിസ്ഥാന സൗകര്യങ്ങളുടെ പുനര്‍ നിര്‍മാണത്തിന് ഇതുവരെ കണ്‍സള്‍ട്ടന്‍സിയെപ്പോലും നിശ്ചയിച്ചിട്ടുമില്ല.

പ്രളയത്തിന് കാരണമായത് ഡാം മാനേജ്‌മെന്റിലെ വീഴ്ചയാണെന്ന അമിക്കസ് ക്യൂറി റിപ്പോര്‍ട്ടുപോലും ചര്‍ച്ചയാകാതെ ശബരിമല വിവാദം കാത്തു. സാധാരണ ഗതിയില്‍ തെരഞ്ഞെടുപ്പ് പ്രചാരണത്തിലാണ് ഇക്കാര്യങ്ങളെല്ലാം ഇഴകീറി പരിശോധിക്കാറ്. എന്നാല്‍, പ്രചാരണത്തില്‍ ശബരിമല വിവാദം മുഖ്യസ്ഥാനം കൈയടക്കിയതോടെ പ്രളയാനന്തര പുനര്‍നിര്‍മാണ പിഴവുകള്‍ മുങ്ങിപ്പോയി. വിലക്കയറ്റം, പ്രവാസികളുടെ പുനരധിവാസ പ്രശ്‌നങ്ങള്‍ തുടങ്ങിയവയും വിചാരണ ചെയ്യപ്പെടാതെ പോയി.
ശബരിമല മുഖ്യ വിഷയമാക്കുന്ന എന്‍.ഡി.എ അസ്വസ്ഥതയുളവാക്കുന്ന ചോദ്യങ്ങളില്‍ നിന്ന് ഇടതുമുന്നണിയെ രക്ഷിക്കുന്നു. പകരം, വര്‍ഗീയത മാത്രം പ്രചാരണ വിഷയമാക്കിയതിലൂടെ നോട്ട് നിരോധനവും, ജി.എസ്.ടിയും ഉന്നയിക്കുന്നതില്‍ നിന്ന് ഇടതുമുന്നണിയും വഴിമാറി. നോട്ട് നിരോധനത്തിലെ അഴിമതിയും മറ്റും കോണ്‍ഗ്രസ് നേതൃത്വം ദേശീയ തലത്തില്‍ ഉയര്‍ത്തുന്നുണ്ടെങ്കിലും അത് കേരളത്തില്‍ സജീവമല്ല. ശബരിമല എന്ന ഒറ്റവിഷയം മാത്രം പ്രചാരണ വിഷയമായതോടെ തെരഞ്ഞെടുപ്പ് യോഗങ്ങളും വിരസമായി. കടുത്ത ചൂടുകൂടിയായതോടെ പ്രചാരണ യോഗങ്ങള്‍ക്ക് ശ്രോതാക്കളും കുറഞ്ഞു. പലയിടത്തും സ്ഥാനാര്‍ഥികളും അണികളും മാത്രമായി ശ്രോതാക്കള്‍. സമൂഹ മാധ്യമങ്ങളിലെ പ്രചാരണങ്ങളിലും മുന്തിയ പരിഗണന ശബരിമലയ്ക്കുതന്നെ. അതേസമയം, വിവിധ തെരഞ്ഞെടുപ്പ് സര്‍വേകളില്‍ സംസ്ഥാനത്ത് 10 ശതമാനം പേര്‍ക്ക് മാത്രമേ ഈ വിഷയത്തില്‍ താല്‍പര്യമുള്ളൂ എന്നും വ്യക്തമായിട്ടുണ്ട്.