ഫഖ്‌റുദ്ധീന്‍ പന്താവൂര്‍
പൊന്നാനി: കൊവിഡ് പ്രതിസന്ധിയില്‍ എല്ലാം തകര്‍ന്നപ്പോള്‍ പിടിച്ചുനില്‍ക്കാന്‍ വഴിയോരത്ത് പച്ചക്കറി വില്‍പന നടത്തുകയാണ് 'ലാല്‍ജോസ് 'എന്ന സിനിമയുടെ സംവിധായകനായ പൊന്നാനി സ്വദേശി കബീര്‍ പുഴമ്പ്രം.പതിനൊന്നു വര്‍ഷം സിനിമയുടെ പിറകെ നടന്ന് അവസാനം സിനിമ എന്ന സ്വപ്നം പൂവണിഞ്ഞ് ഷൂട്ടിങ്ങും മറ്റു ജോലികളും പൂര്‍ത്തിയായപ്പോഴാണ് കൊവിഡ് വ്യാപനവും ലോക്ക് ഡൗണും വന്നത്. അതോടെ
തീയേറ്ററുകള്‍ അടച്ചു പൂട്ടി. ഒപ്പം പ്രതീക്ഷകളും സ്വപ്നങ്ങളും. പ്രതിസന്ധി താങ്ങാന്‍ കഴിയാതെ വന്നപ്പോള്‍ ലാല്‍ജോസ് എന്ന സിനിമയുടെ തിരക്കഥാകൃത്തും സംവിധായകനുമായ കബീര്‍ പുഴമ്പ്രം അതിജീവനത്തിനായി വണ്ടിയില്‍ പച്ചക്കറി വില്‍പനക്കിറങ്ങി. കഴിഞ്ഞ ഒരു മാസമായി കബീര്‍ വാഹനങ്ങളില്‍ പച്ചക്കറി കയറ്റി തെരുവില്‍ വില്‍പ്പന നടത്തും.നിശ്ചിത സ്ഥലങ്ങള്‍ എന്നൊന്നുമില്ല, തെരുവില്‍ എവിടെയെങ്കിലും കച്ചവടക്കാരനായി നില്‍ക്കും.അതിജീവനത്തിന്റെ നല്ല പാഠം പകര്‍ന്നു നല്‍കുന്നതില്‍ വീട്ടുകാരും നാട്ടുകാരും പിന്തുണയുമായുണ്ട്.വെബ്‌സീരീസുകളിലൂടെ ശ്രദ്ധേയനായ മുഹമ്മദ് ശാരിക് നായകനാകുന്ന ചിത്രമാണ് ലാല്‍ജോസ്.ജേണലിസത്തില്‍ ബിരുദാനന്തര ബിരുദം നേടിയ കബീര്‍ പുഴമ്പ്രം വിവിധ മാധ്യമങ്ങളില്‍ ജോലി ചെയ്തിരുന്നെങ്കിലും സിനിമ യായിരുന്നു ലക്ഷ്യം.
ബിരുദ പഠനം പൂര്‍ത്തിയാക്കിയ ശേഷം തിരക്കഥകളുമായി ലൊക്കേഷനുകള്‍ കയറിയിറങ്ങി.
ഈ അലച്ചിനിടയിലാണ് ജേണലിസത്തില്‍ ബിരുദാനന്തര ബിരുദവും കരസ്ഥമാക്കിയത്. പച്ചക്കറി വില്‍പനയായാലും കൂലിപ്പണിയായാലും എല്ലാത്തിനും മാന്യതയുണ്ടെന്നും, തിരക്കഥാകൃത്തും സംവിധായകനുമായ ഒരാള്‍ക്ക് അനുഭവ സമ്പത്താണ് വേണ്ടതെന്നും കബീര്‍ പറയുന്നു. സംവിധായകനായാല്‍ മറ്റു ജോലികള്‍ ചെയ്യുന്നത് കൊണ്ട് എന്താണ് പ്രശ്‌നമെന്നും, ഇഗോ, നാണക്കേട് എന്നിവ മാറ്റി വച്ചാല്‍ ഒരാള്‍ക്ക് ഈ ലോകത്ത് വിജയിക്കാന്‍ കഴിയുമെന്നുമാണ് കബീര്‍ പുഴമ്പ്രം സാക്ഷ്യപ്പെടുത്തുന്നത്. ഏതായാലും പച്ചക്കറിക്കച്ചവടം തന്നെ മറ്റൊരു ജീവിതം പഠിപ്പിച്ചെന്ന്കബീര്‍ പറയുന്നു.