ശ്രീനഗര്‍: ജമ്മുകശ്മീരിലെ അനന്ത്‌നാഗ് ലോക്‌സഭാ മണ്ഡലത്തിലെ ഉപതെരഞ്ഞെടുപ്പ് റദ്ദാക്കി. വോട്ടെടുപ്പിനുള്ള വിജ്ഞാപനം തെരഞ്ഞെടുപ്പ് കമ്മീഷന്‍ റദ്ദാക്കി. മെയ് 25നാണ് അനന്ത്‌നാഗില്‍ വോട്ടെടുപ്പ് നടക്കേണ്ടിയിരുന്നത്. അന്തരീക്ഷം അനുകൂലമല്ലെന്നതിനാലാണ് ഉപതെരഞ്ഞെടുപ്പ് റദ്ദാക്കിയത്.

ഇന്നലെ അര്‍ധരാത്രിക്ക് ശേഷമാണ് വിജ്ഞാപനം പുറപ്പെടുവിച്ചത്. ജമ്മുകശ്മീരിലെ സമാധാനഅന്തരീക്ഷത്തില്‍ ആശങ്കയുള്ളതിനാലാണ് വോട്ടെടുപ്പ് മാറ്റിവയ്ക്കുന്നതെന്നാണ് തെരഞ്ഞെടുപ്പ് കമ്മീഷന്‍ വിജ്ഞാപനത്തില്‍ അറിയിക്കുന്നത്.

കഴിഞ്ഞ ദിവസം ഇന്ത്യയുടെ രണ്ടു സൈനികരെ ആക്രമണത്തില്‍ കൊലപ്പെടുത്തുകുയും ഇവരുടെ മൃതദേഹം വികൃതമാക്കുകയും പാകിസ്താന്‍ ചെയ്തിരുന്നു. ഇതിനെതിരേ ശക്തമായ മറുപടി നല്‍കുമെന്ന് ഇന്ത്യ പറഞ്ഞിരുന്നു. ഈ സംഭവങ്ങളുടെ അടിസ്ഥാനത്തിലാണ് തെരഞ്ഞെടുപ്പ് കമ്മീഷന്റെ തീരുമാനം. ഉപതെരഞ്ഞെടുപ്പ് ഇനി എന്ന് നടത്തുമെന്ന് തീരുമാനിച്ചിട്ടില്ല.