തിരുവനന്തപുരം: ഗുരുതരാവസ്ഥയിലുള്ള രോഗികള്‍ക്കും രോഗികളായ കൈകുഞ്ഞുങ്ങള്‍ക്കൊപ്പം യാത്ര ചെയ്യുന്ന സ്ത്രീകള്‍ക്കും എല്ലാ ട്രെയിനുകളിലും അടിയന്തര ബര്‍ത്ത് അനുവദിക്കണമെന്ന് (എമര്‍ജന്‍സി ക്വാട്ടാ) സംസ്ഥാന മനുഷ്യാവകാശ കമ്മിഷന്‍. ഇത്തരക്കാര്‍ക്ക് ബര്‍ത്ത് ഉറപ്പാക്കുന്ന ഒരു റിസര്‍വേഷന്‍ നയത്തിന് ഭാവിയില്‍ രൂപം നല്‍കണമെന്നും കമ്മിഷന്‍ അംഗം കെ. മോഹന്‍കുമാര്‍ ഉത്തരവില്‍ പറഞ്ഞു.
റെയില്‍വേ ബോര്‍ഡ് സെക്രട്ടറിക്കും ദക്ഷിണ റെയില്‍വേ ഡിവിഷനല്‍ മാനേജര്‍ക്കുമാണ് കമ്മിഷന്‍ ഉത്തരവ് നല്‍കിയത്.ഒരു വയസുള്ള കുഞ്ഞിന് തിരുവനന്തപുരം ശ്രീചിത്ര മെഡിക്കല്‍ സെന്ററില്‍ അടിയന്തര ഹൃദയ ശസ്ത്രക്രിയ നടത്തുന്നതിനായി കണ്ണൂരില്‍ നിന്ന് മാവേലി എക്‌സ്പ്രസില്‍ കയറിയ സ്ത്രീക്ക് സീറ്റ് നിഷേധിച്ച സംഭവത്തില്‍ രജിസ്റ്റര്‍ ചെയ്ത കേസിലാണ് കമ്മിഷന്‍ ഉത്തരവ് പുറപ്പെടുവിച്ചത്.