കോഴിക്കോട്: കെ.എസ്.ആര്‍.ടി.സി മെക്കാനിക്കല്‍ വിഭാഗം ജീവനക്കാര്‍ക്ക് സിംഗിള്‍ ഡ്യൂട്ടി ഏര്‍പ്പെടുത്തിയതില്‍ പ്രതിഷേധിച്ച് സംസ്ഥാനത്ത് ട്രാന്‍സ്‌പോര്‍ട്ട് ഡെമോക്രാറ്റിക് ഫെഡറേഷന്റെയും കെ.എസ്.ആര്‍.ടി.സി എംപ്ലോയീസ് അസോസിയേഷന്റെയും നേതൃത്വത്തില്‍ നടത്തിയ സമരം ഒത്തുതീര്‍പ്പാക്കിയിട്ടും ബസ് ഓടാത്തതിനാല്‍ യാത്രക്കാര്‍ കോഴിക്കോട് ബസ് ടെര്‍മിനല്‍ ഉപരോധിച്ചു.
വൈകിട്ട് മൂന്നോടെ സ്റ്റാന്‍ഡിലെത്തിയ യാത്രക്കാര്‍ രാത്രി എട്ടായിട്ടും സര്‍വിസ് ആരംഭിക്കാത്തതിനാല്‍ ഉപരോധം തീര്‍ക്കുകയായിരുന്നു. സമരം പിന്‍വലിച്ച് മണിക്കൂര്‍ അഞ്ചു കഴിഞ്ഞിട്ടും വയനാട്ടിലേക്ക് സര്‍വിസ് ആരംഭിക്കാന്‍ തയാറാകാത്തതില്‍ ക്ഷുഭിതരായ യാത്രക്കാര്‍ സ്റ്റാന്‍ഡില്‍ തടിച്ചുകൂടി. തുടര്‍ന്നാണ് മറ്റ് സര്‍വിസുകള്‍ നടത്താന്‍ അനുവദിക്കാതെ യാത്രക്കാര്‍ സ്റ്റാന്‍ഡില്‍ ബഹളം വച്ചത്.
മറ്റു ജില്ലയിലേക്കുള്ള സര്‍വിസുകളടക്കം യാത്രക്കാര്‍ തടഞ്ഞതോടെ സ്റ്റാന്‍ഡില്‍ യാത്രക്കാരും കെ.എസ്.ആര്‍.ടി.സി ജീവനക്കാരും തമ്മില്‍ വാക്കേറ്റവുമുണ്ടായി. തുടര്‍ന്ന് പൊലിസ് ഇടപെട്ട് രാത്രി 9.15ഓടെ പ്രശ്‌നം പരിഹരിക്കുകയായിരുന്നു.