കൊണ്ടോട്ടി: തിരുവനന്തപുരം അടക്കമുള്ള വിമാനത്താവളങ്ങളുടെ നടത്തിപ്പ് സ്വകാര്യമേഖലയ്ക്ക് കൈമാറാനുള്ള നീക്കത്തില്‍ നിന്ന് കരിപ്പൂര്‍ തെന്നിമാറിയത് അവസാന നിമിഷം. എയര്‍പോര്‍ട്ട് അതോറിറ്റിക്ക് കീഴിലുള്ള 10 വിമാനത്താവളങ്ങളാണ് സ്വകാര്യവല്‍ക്കരിക്കാന്‍ നരേന്ദ്രമോദി സര്‍ക്കാര്‍ നേരത്തെ തീരുമാനിച്ചിരുന്നത്. ഇതിനെതിരേ എയര്‍പോര്‍ട്ട് അതോറിറ്റി ജീവനക്കാര്‍ പ്രതിഷേധവും നടത്തിയിരുന്നു. സ്വകാര്യവല്‍ക്കരിക്കുന്ന വിമാനത്താവളങ്ങളുടെ എണ്ണം പിന്നീട് ആറാക്കിചുരുക്കിയതോടെയാണ് ഈ പട്ടികയില്‍ ഉണ്ടായിരുന്ന കരിപ്പൂര്‍ ഒഴിവായത്. ഇതില്‍ തിരുവനന്തപുരം,ജയ്പൂര്‍,ഗുവാഹത്തി വിമാനത്താവളങ്ങളാണ് നിലവില്‍ 50 വര്‍ഷത്തേക്ക് പാട്ടത്തിന് കൈമാറിയത്.
തിരുവനന്തപുരം അദാനി ഗ്രൂപ്പിന് കൈമാറുന്നതോടെ സംസ്ഥാനത്ത് എയര്‍പോര്‍ട്ട് അതോറിറ്റിക്ക് കീഴിലുള്ള ഏക വിമാനത്താവളമായി കരിപ്പൂര്‍ മാറും. രാജ്യത്ത് ഏറ്റവും കൂടുതല്‍ അന്താരാഷ്ട്ര വിമാനത്താവളങ്ങളുള്ള കേരളത്തില്‍ ഇതുവരെ കരിപ്പൂര്‍,തിരുവനന്തപുരം എന്നിവ കേന്ദ്രസര്‍ക്കാര്‍ നിയന്ത്രണത്തിലാണ് പ്രവര്‍ത്തിച്ചിരുന്നത്. കൊച്ചിയും കണ്ണൂരും സ്വകാര്യ കമ്പനികളുടെ കീഴിലും.
ഇന്ത്യയില്‍ ചെറുതും വലുതുമായി 168 വിമാനത്താവളങ്ങളാണുള്ളത്. ഇവയില്‍ ഏറ്റവും കൂടുതല്‍ യാത്രക്കാരും ഒപ്പം കോടികളുടെ വരുമാനം നേടുന്നവയും കേന്ദ്രം നേരത്തെ സ്വകാര്യ ഏജന്‍സികള്‍ക്ക് കൈമാറിയ വിമാനത്താവളങ്ങളാണ്. ഡല്‍ഹി, മുംബൈ, ഹൈദരബാദ്, ബംഗളൂരു വിമാനത്താവളങ്ങള്‍ 30 വര്‍ഷത്തേക്കാണ് നടത്തിപ്പിന് നല്‍കിയത്. ഇത് വഴി സ്വകാര്യ ഏജന്‍സികള്‍ കൊയ്യുന്നത് കോടികളാണ്.
ജി.വി.ആര്‍, ജി.എം.ആര്‍ എന്നീ രണ്ടുവന്‍കിട കുത്തക കമ്പനികളാണ് ദില്ലി, മുംബൈ, ഹൈദരബാദ്, ബംഗളൂരു വിമാനത്താവളങ്ങള്‍ വാടക്ക് എടുത്തിരിക്കുന്നത്. ഇന്ത്യയില്‍ ഏറ്റവും കൂടുതല്‍ എയര്‍പോര്‍ട്ട് അതോറിറ്റിക്ക് വരുമാനം നേടിക്കൊടുക്കുന്ന വിമാനത്താവളങ്ങളായിരുന്നു ഇവ. എന്നാല്‍ സ്വകാര്യ കമ്പനികള്‍ക്ക് 30 വര്‍ഷത്തേക്ക് നല്‍കിയതോടെ കോടികളുടെ വരുമാനം ഇവര്‍ക്കായി. കഴിഞ്ഞ സാമ്പത്തിക വര്‍ഷം മാത്രം ജി.എം.ആര്‍ 2,600 കോടിയാണ് വിമാനത്താവളങ്ങളില്‍ നിന്ന് വരുമാനമായി നേടിയെടുത്തത്.