ബംഗളൂരു റൂട്ടില്‍ സര്‍വിസ് നടത്തിയിരുന്ന സൂപ്പര്‍ ഫാസ്റ്റില്‍ യാത്രക്കാരെ ആകര്‍ഷിക്കാന്‍ പാസഞ്ചേഴ്‌സ് അസോസിയേഷന്‍ ആകര്‍ഷമായ സമ്മാനപദ്ധതികള്‍ എര്‍പ്പെടുത്തിയിരുന്നു
കാഞ്ഞങ്ങാട്:  കാഞ്ഞങ്ങാട്-ബംഗളൂരു സര്‍വിസ് സൂപ്പര്‍ ഫാസ്റ്റ് ബസിനു പകരമായി സൂപ്പര്‍ ഡീലക്‌സ് ബസ് എത്തി. രണ്ടര മാസം മുമ്പ് സര്‍വിസ് ആരംഭിക്കുമ്പോള്‍ സൂപ്പര്‍ ഫാസ്റ്റ് ബസാണ് ഈ റൂട്ടില്‍ ഓടിയിരുന്നത്.
എന്നാല്‍ ദീര്‍ഘദൂര യാത്രക്ക് സാധാരണ സൂപ്പര്‍ ഫാസ്റ്റ്  ബസ് അനുയോജ്യമല്ലെന്നു കാട്ടി പയ്യാവൂര്‍ മുതല്‍ കാഞ്ഞങ്ങാട് വരെയുള്ള യാത്രക്കാരുടെ പരാതി വ്യാപകമായതിനെ തുടര്‍ന്നു മലയോര താലൂക്ക്  ബസ് പാസഞ്ചേഴ്‌സ് അസോസിയേഷന്‍ കെ.എസ്.ആര്‍.ടി.സി ഡയറക്ടര്‍ ബോര്‍ഡംഗം ടി.കെ രാജന്‍ മുഖേന  അധികൃതര്‍ക്ക് നല്‍കിയ നിവേദനത്തെ തുടര്‍ന്ന് യുദ്ധകാല വേഗതയിലാണ് പുതിയ സൂപ്പര്‍ ഡീലക്‌സ് ബസ് ഈ റൂട്ടില്‍ അനുവദിച്ചത്.
ബംഗളുരു റൂട്ടില്‍ സര്‍വിസ് നടത്തിയിരുന്ന സൂപ്പര്‍ ഫാസ്റ്റില്‍ യാത്രക്കാരെ ആകര്‍ഷിക്കാന്‍ പാസഞ്ചേഴ്‌സ് അസോസിയേഷന്‍ ആകര്‍ഷമായ സമ്മാനപദ്ധതികള്‍ എര്‍പ്പെടുത്തിയിരുന്നു. ഓരോ ആഴ്ചയിലും യാത്രക്കാരുടെ മൊബൈല്‍ നമ്പര്‍ നറുക്കെടുത്താണ് വിജയകിളെ കണ്ടെത്തിയത്.
ബുക്കിങ്  എജന്‍സികള്‍, ഏറ്റവും കൂടുതല്‍ വരുമാനമുണ്ടാക്കുന്ന ജീവനക്കാര്‍ എന്നിവര്‍ക്കും സമ്മാനങ്ങള്‍ നല്‍കിയിരുന്നു.
പുതിയ  ബസിലെ യാത്രക്കാര്‍ക്ക് ബസിനകത്ത് ഫില്‍ട്ടര്‍ ചെയ്ത കുടിവെള്ളം, വിശേഷ ദിവസങ്ങളില്‍ മധുരം വിളമ്പല്‍, ശനി, ഞായര്‍ ദിവസങ്ങളൊഴികെയുള്ള ദിവസങ്ങളിലെ യാത്രക്കാരുടെ നമ്പറുകള്‍ നറുക്കെടുത്ത് സര്‍പ്രൈസ് സമ്മാനങ്ങള്‍ നല്‍കല്‍ തുടങ്ങിയ വൈവിധ്യമാര്‍ന്ന യാത്രാ പ്രോത്സാഹന പദ്ധതിക്കു രൂപം നല്‍കിയിട്ടുണ്ടെന്ന് പാസഞ്ചേഴ്‌സ് അസോസിയേഷന്‍ കണ്‍വീനര്‍  എം.വി രാജു പറഞ്ഞു.