കാസര്‍കോട്: അനധികൃതമായി ഓട്ടോയില്‍ കടത്തുകയായിരുന്ന മണല്‍ പിടികൂടാന്‍ ശ്രമിച്ച സി.ഐയെ ഓട്ടോയിടിച്ചു കൊലപ്പെടുത്താന്‍ ശ്രമം. തലക്കും കൈയ്ക്കും പരുക്കേറ്റ കാസര്‍കോട് സി.ഐ സി.എ അബ്ദുല്‍ റഹിമിനെ ജനറല്‍ ആശുപത്രിയില്‍ പ്രവേശിപ്പിച്ചു. ചൊവ്വാഴ്ച രാത്രി പത്തരയോടെ തളങ്കര മാലിക് ദീനാര്‍ ജുമാ മസ്ജിദ് റോഡില്‍ വച്ചാണു സംഭവം.
തളങ്കരയില്‍ നിന്ന് അനധികൃതമായി പുഴ മണല്‍ കടത്തുന്നുണ്ടെന്ന വിവരം അറിഞ്ഞതിനെ തുടര്‍ന്നു ഡ്രൈവര്‍ക്കൊപ്പം എത്തിയതായിരുന്നു സി.ഐ. ഈ സമയം പ്ലാസ്റ്റിക്ക് ചാക്കുകളിലാക്കി മണല്‍ നിറച്ച ഓട്ടോറിക്ഷ നിര്‍ത്താന്‍ ആവശ്യപ്പെട്ടപ്പോള്‍ സി.ഐക്ക് നേരേ ഓട്ടോ ഓടിക്കുകയായിരുന്നു. ഒഴിഞ്ഞു മാറിയെങ്കിലും വീഴ്ചയില്‍ സി.ഐയുടെ തലക്കും കൈയ്ക്കും പരുക്കേറ്റു. പിന്നീട് ഓട്ടോ ഏതാനും മീറ്റര്‍ അകലെ നിര്‍ത്തി ഓട്ടോയിലുണ്ടായിരുന്നവര്‍ രക്ഷപ്പെട്ടു. അനധികൃതമായി മണല്‍ കടത്തിയതിനും സി.ഐയെ ഓട്ടോ ഇടിച്ചു കൊലപ്പെടുത്താന്‍ ശ്രമിച്ചതിനും കണ്ടാലറിയാവുന്ന രണ്ടു പേര്‍ക്കെതിരേ പൊലിസ് കേസെടുത്തു.