തിരുവനന്തപുരം: പ്രാദേശികമായി മാര്‍ക്‌സിസ്റ്റ് പാര്‍ട്ടിയുമായി ധാരണയുണ്ടാക്കിയതിന്റെ ഉത്തരവാദിത്വം ഏറ്റെടുക്കുന്നുവെന്ന് കെഎം മാണി. ജില്ലാ പഞ്ചായത്ത് പ്രസിഡന്റ് തെരഞ്ഞെടുപ്പില്‍ സിപിഎം പിന്തുണ സ്വീകരിച്ച വിഷയം പ്രാദേശിക നീക്കുപോക്കു മാത്രമാണെന്നും അദ്ദേഹം വ്യക്തമാക്കി.

പാര്‍ട്ടി സംസ്ഥാന നേതൃത്വം അറിഞ്ഞെടുത്ത തീരുമാനമല്ല കോട്ടയം ജില്ലാ പഞ്ചായത്ത് പ്രസിഡന്റ് തെരഞ്ഞെടുപ്പിലുണ്ടായത്. ഇത് കോട്ടയം ഡിസിസി ക്ഷണിച്ചുവരുത്തിയ തിരിച്ചടിയാണ്. കേരള കോണ്‍ഗ്രസിനെ അധിക്ഷേപിച്ച് തുടര്‍ച്ചയായി രംഗത്തുവന്ന കോട്ടയം ഡിസിസിയോടുള്ള പ്രാദേശികമായ എതിര്‍പ്പാണ് ജില്ലാ പഞ്ചായത്ത് പ്രസിഡന്റ് തെരഞ്ഞെടുപ്പില്‍ കണ്ടത്.പിജെ ജോസഫുമായി അഭിപ്രായ വ്യത്യാസമില്ലെന്നും മാണി പറഞ്ഞു.

അന്ധമായ വിരോധമോ അസ്പൃശ്യതയോ ആരോടുമില്ല. ഒരോ സമയത്തും വിവേചിച്ചു നോക്കി ശരിയുടെ ഭാഗത്തു നില്‍ക്കും. ഇടതിനെ പിന്തുണയ്ക്കുന്നത് അപരാധമാണോയെന്നും അദ്ദേഹം ചോദിച്ചു. പ്രാദേശികമായി അവരുമായി തൊട്ടുപോയി എന്നതു വലിയ അപരാധമായി കാണേണ്ടതില്ല.കോട്ടയം ജില്ലാ പഞ്ചായത്തിലുണ്ടായത് ഏതെങ്കിലുമൊരു കൂട്ടുകെട്ടിലേക്കുള്ള ചവിട്ടുപടിയൊന്നുമല്ലെന്നും മാണി പറഞ്ഞു.