കൊല്ലം: കരുനാഗപ്പള്ളി, കായംകുളം ഭാഗങ്ങളില്‍ സ്പിരിറ്റ് കണ്ടുപിടിച്ചതുമായി ബന്ധപ്പെട്ട് കരുനാഗപ്പള്ളി, ശാസ്താംകോട്ട, കൊല്ലം, ചാത്തന്നൂര്‍ റെയിഞ്ചുകളിലെ കള്ളുഷാപ്പുകളില്‍ എക്‌സൈസ് കമ്മിഷണര്‍ ഋഷിരാജ് സിങ് നേരിട്ട് പരിശോധന നടത്തി.
 എക്‌സൈസ് കമ്മിഷണറുടെ സ്‌ക്വാഡ് പാര്‍ട്ടിയും തിരുവനന്തപുരം ജില്ലയിലെ എക്‌സൈസ് ഉദ്യോഗസ്ഥരും പരിശോധനയില്‍ പങ്കെടുത്തു. ഏഴ് കള്ള് സാമ്പിളുകള്‍ ശേഖരിച്ച് രാസപരിശോധനക്ക് അയയ്ക്കുകയും ലൈസന്‍സ് വ്യവസ്ഥകള്‍ക്ക് വിരുദ്ധമായി പ്രവര്‍ത്തിച്ച ഒരു ഷാപ്പിനെതിരേ കേസെടുക്കുകയും ചെയ്തു. തുടര്‍ന്നും കള്ളുഷാപ്പുകളില്‍ കര്‍ശനമായ പരിശോധനകള്‍ നടത്തുന്നതാണെന്ന് കമ്മിഷണര്‍ അറിയിച്ചു.