കോവളം: വീട്ടുമുറ്റത്തെ 80 അടിയോളം താഴ്ചയുള്ള കിണറ്റില്‍ അര്‍ധരാത്രിയില്‍ വീണ മധ്യവയസ്‌കനെ ഫയര്‍ഫോഴ്‌സെത്തി രക്ഷപ്പെടുത്തി. വെങ്ങാനൂര്‍ നെല്ലിവിള കാട്ടുകുളം വാറുവിള വീട്ടില്‍ കതിരേശന്‍ (47) ആണ് കഴിഞ്ഞദിവസം രാത്രി പതിനൊന്നരയോടെ കിണറ്റില്‍ വീണത്.
നിലവിളി കേട്ടെത്തിയ നാട്ടുകാര്‍ ഫയര്‍ഫോഴ്‌സില്‍ വിവരമറിയിക്കുകയായിരുന്നു. വിഴിഞ്ഞത്തു നിന്നെത്തിയ ഫയര്‍ഫോഴ്‌സ് ഉദ്യോഗസ്ഥര്‍ ഏറെ നേരത്തെ പരിശ്രമത്തിനൊടുവിലാണ് രക്ഷപ്പെടുത്തിയത്. വര്‍ഷങ്ങളായി ആള്‍ത്താമസമില്ലാതിരുന്ന വീട്ടില്‍ ഇടവിട്ട് കതിരേശന്‍ വന്നുപോകുമായിരുന്നെന്ന് നാട്ടുകാര്‍ പറയുന്നു. കഴിഞ്ഞ ദിവസം ഇയാള്‍ ഇവിടെ വന്ന വിവരം ആരും അറിഞ്ഞിരുന്നില്ല. വിഴിഞ്ഞം ഫയര്‍‌സ്റ്റേഷനിലെ സ്റ്റേഷന്‍ ഓഫിസര്‍ റോസ്ചന്ദ്രന്റെ നേതൃത്വത്തില്‍ ലീഡിങ് ഫയര്‍മാന്‍ അനില്‍കുമാര്‍, ഫയര്‍മാന്‍മാരായ ജിജുമോന്‍, രതീഷ്, സജിന്‍ ജോസ്, ആനന്ദ്, അനീഷ്, സ്റ്റാന്‍ലി ജോണ്‍, രാജന്‍ എന്നിവരുള്‍പ്പെട്ട സംഘമാണ് കതിരേശനെ പുറത്തെടുത്തത്. നേരിയ പരുക്കേറ്റ ഇയാളെ വിഴിഞ്ഞം പൊലിസ് ആശുപത്രിയിലാക്കി.