കുവൈത്ത് സിറ്റി: കുവൈത്തില്‍ എഐ ക്യാമറകള്‍ കണ്ണു തുറന്നതോടെ വെട്ടിലായത് നിയമലംഘനം നടത്തുന്ന ഡ്രൈവര്‍മാര്‍. കുവൈത്തിന്റെ വിവിധ ഭാഗങ്ങളില്‍ സ്ഥാപിച്ച ക്യാമറകള്‍ സജീമായതോടെ പതിനെണ്ണായിരത്തോളം നിയമ ലംഘനങ്ങളാണ് റിപ്പോര്‍ട്ട് ചെയ്തത്. കഴിഞ്ഞ 15 ദിവസത്തിനിടെ 18,778 നിയമലംഘനങ്ങള്‍ കണ്ടെത്തിയതായി ഗതാഗത മന്ത്രാലയവുമായി ബന്ധപ്പെട്ട അടുത്ത വൃത്തങ്ങള്‍ അറിയിച്ചു. കുവൈത്തിലെ പ്രധാന പാതകളിലായി ഇരുനൂറ്റി അമ്പതിലേറെ എഐ ക്യാമറകളാണ് ഇപ്പോള്‍ പ്രവര്‍ത്തിക്കുന്നത്. 

2024ല്‍ ഗതാഗത അപകട മരണങ്ങള്‍ കുറഞ്ഞതായി ഗതാഗത വകുപ്പിലെ ഒരു മുതിര്‍ന്ന ഉദ്യോഗസ്ഥന്‍ പ്രതികരിച്ചു.
2023ല്‍ 296 അപകട മരണങ്ങള്‍ ഉണ്ടായപ്പോള്‍ 2024ല്‍ 284 മരണങ്ങളാണ് സംഭവിച്ചത്. പുതിയ എഐ ക്യാമറകള്‍ ഡ്രൈവര്‍മാരുടെ വേഗപരിധി ലംഘനങ്ങള്‍ കണ്ടെത്തുന്നതിനും നിരീക്ഷിക്കുന്നതിനും സഹായകരമാകും.