ഗുവാഹത്തി: വനിതാ അണ്ടര്‍ 23 ട്വന്റി 20യില്‍ മേഘാലയക്കെതിരെ കേരളത്തിന് കൂറ്റൻ വിജയം. 104 റണ്‍സിനാണ് കേരളം മേഘാലയയെ പരാജയപ്പെടുത്തിയത്. ആദ്യം ബാറ്റ് ചെയ്ത കേരളം 20 ഓവറില്‍ മൂന്ന് വിക്കറ്റ് നഷ്ടത്തില്‍ 156 റണ്‍സെടുത്തു. മറുപടി ബാറ്റിങ്ങിന് ഇറങ്ങിയ മേഘാലയ 52 റണ്‍സിന് ഓള്‍ ഔട്ടായി.

തുടക്കത്തില്‍ തന്നെ രണ്ട് വിക്കറ്റുകള്‍ നഷ്ടമായ കേരളത്തെ അനന്യ കെ പ്രദീപും വൈഷ്ണ എം പിയും ചേര്‍ന്ന കൂട്ടുകെട്ടാണ് മികച്ച അടിത്തറ പാകിയത്. ഇരുവരും ചേര്‍ന്ന് മൂന്നാം വിക്കറ്റില്‍ 93 റണ്‍സ് കൂട്ടിച്ചേര്‍ത്തു. അനന്യ 35 പന്തുകളില്‍ നിന്ന് 49 റണ്‍സെടുത്തു. അനന്യക്ക് ശേഷമെത്തിയ ക്യാപ്റ്റന്‍ നജ്‌ല സി എം സിയും അതിവേഗം സ്‌കോര്‍ ഉയര്‍ത്തി. നജ്‌ല 13 പന്തുകളില്‍ 30 റണ്‍സുമായും വൈഷ്ണ 49 പന്തുകളില്‍ 50 റണ്‍സുമായും പുറത്താകാതെ നിന്നു. 

മറുപടി ബാറ്റിങ്ങിന് ഇറങ്ങിയ മേഘാലയ ബാറ്റിങ് നിരയില്‍ ആര്‍ക്കും നിലയുറപ്പിക്കാനായില്ല. ആകെ രണ്ട് പേര്‍ക്ക് മാത്രമാണ് രണ്ടക്കം കടക്കാനായത്. 20 ഓവറില്‍ 52 റണ്‍സിന് മേഘാലയ ഓള്‍ ഔട്ടാവുകയായിരുന്നു. നാല് വിക്കറ്റ് വീഴ്ത്തിയ അലീന എം പിയാണ് കേരള ബൗളിങ് നിരയില്‍ തിളങ്ങിയത്. ഐശ്വര്യ എ കെ മൂന്നും അജന്യ ടി പി രണ്ടും വിക്കറ്റുകള്‍ വീതം നേടി.