രാജാക്കാട്: മദ്യപിച്ച് ബെര്‍മുടയും ധരിച്ച് ആശുപത്രിയിലെത്തിയ മൃഗഡോക്ടര്‍ക്കെതിരേ പ്രതിക്ഷേധവുമായി നാട്ടുകാര്‍ രംഗത്തെത്തി. നാട്ടുകാര്‍ വിവരമറിയിച്ചതിന്റെ  അടിസ്ഥാനത്തില്‍ പൊലിസെത്തി ഇയാളെ കസ്റ്റഡിയിലെടുത്തു. രാജാക്കാട് മൃഗാശുപത്രിയിലെ വെറ്റിനറി സര്‍ജന്‍  ഡോ. എ. സന്തോഷിനെയാണ് പൊലിസ് കസ്റ്റഡിയില്‍ എടുത്തത്. സ്ത്രീകളടക്കം ജോലി ചെയ്യുന്ന ഓഫിസിലാണ് ഇയാള്‍ മദ്യപിച്ച് ബര്‍മുടയും ധരിച്ച് എത്തിയത്.
ഇന്നലെ രാവിലെയാണ് പരിക്കേറ്റ ആടിനെയുമായി രാജാക്കാട് സ്വദേശി ആശുപത്രിയില്‍ എത്തുന്നത്. എന്നാല്‍ മദ്യപിച്ചെത്തിയ ഡോക്ടര്‍ ആടിനെ നോക്കുന്നതിനോ ഇവരുമായി സംസാരിക്കുവാനോ തയ്യാറായില്ല. തുടര്‍ന്ന് നാട്ടുകാര്‍ സംഘടിക്കുകയും വാക്കേറ്റമുണ്ടാകുകയും ചെയ്തു. ഗ്രാമപഞ്ചായത്ത് പ്രസിഡന്റടക്കം സ്ഥലത്തെത്തി സംസാരിച്ചിട്ടും മദ്യലഹരിയിലായിരുന്ന ഡോക്ടര്‍ കേള്‍ക്കുവാന്‍ തയ്യാറായില്ല. തുടര്‍ന്ന് പ്രതിക്ഷേധക്കാര്‍ തന്നെ രാജാക്കാട് പൊലിസില്‍ വിവരമറിയിക്കുകയായിരുന്നു. രാജാക്കാട് എസ്.ഐ പി.ഡി അനൂപ് മോന്റെ നേതൃത്വത്തില്‍ ഇയാളെ കസ്റ്റടിയില്‍ എടുക്കയായിരുന്നു.
പൊതുജനങ്ങളുടെ നികുതി പണം കൊണ്ട് ശമ്പളം കൈപ്പറ്റുകയും ജനങ്ങള്‍ക്ക് വേണ്ടി പ്രവര്‍ത്തിക്കുകയും ചെയ്യാത്ത ഇത്തരം ഉദ്യോഗസ്ഥന്മാര്‍ക്കെതിരേ നടപടി സ്വീകരിക്കണമെന്നും നാട്ടുകാര്‍ ആവശ്യപ്പെട്ടു.  കര്‍ഷകര്‍ക്ക് ലഭിക്കേണ്ട കാലിത്തീറ്റ സബ്‌സിഡിയുടേതടക്കമുള്ള ഫയലുകള്‍ മാസങ്ങളായി ഇവിടെ കെട്ടിക്കിടക്കുകയാണ്.