തൊടുപുഴ: അര്‍ധരാത്രിയില്‍ തൊടുപുഴയാറ്റിലേയ്ക്ക് കക്കൂസ് മാലിന്യം ഒഴുക്കിയ ഹോട്ടല്‍ ജീവനക്കാരെ പൊലിസ് കസ്റ്റഡിയിലെടുത്തു.
തൊടുപുഴ കെ.എസ്.ആര്‍.ടി.സി ബസ് ഡിപ്പോയ്ക്ക് സമീപത്തെ പേള്‍ റോയല്‍ ഹോട്ടലില്‍ നിന്നാണ് മോട്ടോര്‍ ഉപയോഗിച്ച് തൊടുപുഴ ആറ്റിലേയ്ക്ക് കക്കൂസ് മാലിന്യം തള്ളിയതെന്ന് തൊടുപുഴ സി.ഐ എന്‍. ജി. ശ്രീമോന്‍ പറഞ്ഞു.
ബുധനാഴ്ച രാത്രി 11.30 ഓടെയായിരുന്നു സംഭവം. അസഹനീയമായ ദുര്‍ഗന്ധം ശ്രദ്ധയില്‍പ്പെട്ട പരിസരവാസികളാണ് ഇക്കാര്യം പൊലിസിനെ അറിയിച്ചത്. പൊലിസ് എത്തുന്നതറിഞ്ഞ് മോട്ടോര്‍ പ്രവര്‍ത്തിപ്പിക്കുന്നത് ഹോട്ടല്‍ ജീവനക്കാര്‍ നിര്‍ത്തിവച്ചു.
പൊലിസ് എത്തുമ്പോള്‍ പ്രദേശമാകെ ദുര്‍ഗന്ധമായിരുന്നു. മാലിന്യം തള്ളിയത് സ്ഥിരീകരിച്ച പൊലിസ് അധികാരികള്‍ ഹോട്ടല്‍ മാനേജരെയും ജീവനക്കാരനെയും കസ്റ്റഡിയില്‍ എടുത്തു.
പിന്നീട് പുലര്‍ച്ചയോടെ പ്രതികളെ ജാമ്യത്തില്‍ വിട്ടു. ഇവര്‍ക്കെതിരെ പുഴ മലിനമാക്കിയതിന് കേസെടുത്തു.